شارب الخمر (الجزء الأول )

تعريف الخمر: الخمر هى سائل يصنع عن طريق تخمير العصائر او الحبوب او الفواكه حيث يتحول النشا فيها او السكر الى كحول بواسطة بكتريا التخمر وقد اخذت الاسم منه.

فعل الخمر: الخمر تسكر وتذهب العقل وتفقد الانسان وعيه تدريجيا حسب الكميه التى يتاناولها وتأيرها له ولكن لا شك انها تذهب ببعض عقله حتىلو كانت كميه قليله منها.

تحريم الخمر:
لما نكون بنعلم الطفل ياكل مثلا لازم يكون ده تدريجى وفى الاول بنتسامح معاه انه يوقع لحد ما يجى وقت ونقوله ما توقعش على هدومك بقى خلاص
عشان كده من عظمة رسالة الرسول عليه الصلاة والسلام انها كمان كلها علىالعموم كانت تدريجيه عشان تقدر تغير عادات وتقاليد شعب وامه كامله وكان تحريم الخمر تدريجيا فعلا ازاي الكلام ده هانشوف
اول آيه فى تحريم الخمر نزلت على الرسول عليه الصلاة والسلام بعد الهجره فىالمدينه يعنى وهى:( يسألونك عن الخمر والميسر قل فيهما إثم كبير ومنافع للناس وإثمهما أكبر من نفعهما) يعني الاول بتعرفنا الايه انها اولا شرب الخمر خطأ وان ذنبها اكبر من فوائدها اذا كانت تجاره ولا دواء ولا حتى مزاج المهم الايه دى فيها ترجيح للتحريم وليس تحريم قاطع. فقال بعض الناس نشربها لفوائدها وقال البعض لا طالاما فيها اثم ما نشربهاش.
بعد كده نزل التحريم التانى للخمر وهو التحريم فى الصلاه قال تعالى(يأيها الذين آمنوا لا تقربوا الصلاة وأنتم سكرى حتى تعلموا ما تقولون......) ده تانى حاجه بنقول الخمرا بتذهب بعقلكم ما يصحش تصلوا لربنا وانتم كده وكان سبب نزولها ان رجلا صلى وهو مخمور فقال ( يا ايها الكافرون اعبد ما تعبدون ) بدلا من لا اعبد ما تعبدون. فقال البعض نشربها ونقعد فى البيت وفى تانيين قالو لا خير فى شيء يحول بننا وبين الصلاه مع المسلمين.
واخيرا نزلت آيه التحريم القطعى للخمر حيث قال تعالى( يأيها الذين آمنوا إنما الخمر والميسر والأنصاب والأزلام رجس من عمل الشيطان فاجتنبوه لعلكم تفلحون . انما يريد الشيطان أن يوقع بينكم العداوة والبغضاء فى الخمر والميسر ويصدكم عن ذكر الله وعن الصلاة فهل انتم منتهون؟.....).(رجس: خبيث )
نفهم بقى الايه الاول بنقول ان الخمر ده حاجه وحشه وثانيا انها من عمل الشيطان ووسسته لينا وثالثا ما دام هى كده تبقى من الواجب اجتنبها والبعد عنها ورابعا بقى توضيح كده بمراد الشيطان من ذلك ايه انه يوقع بينكم العداوه والبغضاء ويلهيكم كمان عن ذكر الله والصلاه وفى الاخر بقى بيقولنا ايه فهل انتم منتهون؟
تمام كده وصلت ان التحريم بقى قطعى فى مسألة الخمر تمام؟

ده كان التحريم فى القرآن نشوف بقى الرسول عليه الصلاة والسلام قال ايه فى الخمر وشاربها:

عن انس قال رسول الله صلى الله عليه وسلم: ( لعن فى الخمر عشره: عاصرها ومعتصرها وشاربها و حاملها والمحموله اليه وساقيها وبائعها وآكل ثمنها والمشترى لها والمشترى له) صدق رسول الله

وقال رسول الله ايضا : كل مسكر خمر وكل خمر حرام .

وعن روايه مسلم عن جابر ان رجلا جاء من اليمن سأل رسول الله عن شراب يشربونه بارضهم من ا لذره يقال له (المزر)بكسر الميم فقال رسول الله : امسكر هو؟ قال الرجل نعم فقال رسول الله :( كل مسكر حرام.....إن على الله عهدا لمن يشرب المسكر أن يسقيه من طينه الخبال ) قالو يا رسول الله وما طينة الخبال؟
قال : عرق اهل النار أو عصارة اهل النار.

وقال رسول الله ايضا: إن من العنب خمرا وإن من التمر خمرا وإن من العسل خمرا وإن من البر ( القمح) خمرا وإن من الشعير خمرا )
وقال : ما أسكر كثيره فقليله حرام.

وطبعا اكيد اكترنا عارف الكلام ده ومافيش فيه نقاش ولا اختلاف على حرمانيه الخمر قليله وكثيره

نيجى بقى لشبيهتها فى زمننا الجميل وهى المخدرات تفتكروا المخدرات حرام نفس درجة تحريم الخمور؟؟؟
الاجابه هى ليه لا ؟

هى مش الخمور دي محرمه لانها تغيب العقل اظن كمان المخدرات لا تقل عنها مفسده
تعالو نشوف بن تيميه قال ايه فيها( إن الحشيشه حرام يحد متناولها ما يحد شارب الخمر وهى أخبث من الخمر من جهة أنها تفسد العقل والمزاج ....... ) الىاخره من نفس الكلام المقال عن الخمر وانواعه.

وطبعا الخمر والمخدرات وكل ما يندرج باسمها حرام الا تجار فيها فقال رسول الله صلى الله عليه وسلم
: ( ان الله حرم بيع الخمر والميته والخنزير والاصنام) وبما اننا ادرجنا المخدرات تحت بند المسكرات يبقى هى تاخد نفس حكم الخمر فى التجاره برضه يعنى حرام
وطبعا زراعة النباتات للغرض ده برضه حرام وكمان صناعتها كله بقى لكن اكيد زراعة العنب للاكل مش حرام ان عشان الخمور حرام طبعا وقيس على ذلك بقى كل النباتات والصناعات والى بيقدموها وكل الناس الى المشتركه فىالجريمه يبقى حرام
الحاجه بقى الى يمكن ما تعرفهاش تخص السجائر انا عن نفسى عرفتها قريب ان فى بعض العلماء حرموا السجائر مش عشان ضرر النفّس بس ولا الكلام ده لا عشان بيدخل فى تصنيعها الخمور . يبقى حتى استعمالها فى تصنيع اي شيء يحرم هو والمنتج كمان . وطبعا طريقة تصنيع الدخان وتخميره معروفه وفعلا بيستعمل فيها كحوليات.

ومن أطرف الحاجات الى سمعتها واحد بيقولى لا لا مش خمور ده سبرتو!!!!!!!!!!!!؟؟؟؟؟؟؟؟؟ مش عارفه هو السبرتو ده مش كحول؟ ولا تفتكر يكون شربات ورده؟ ؟؟؟؟ المهم اللهم بلغت اللهم فاشهد يا جماعه السجائر صحيح مختلف عليها لكن انا مقتنعه انها حرام ده غير انها مقرفه اصلا والله العظيم انتم رجاله وكبار وروشين وكل حاجه من غير البتاعه المقرفه الى ماسكينها فى ايديكم . وكفايه المصيبه الى بقت فى الدنيا البنات الى ماشين ماسكين سجائر كمان ان شاء الله هايخلفوا عيال هبله من كده وربنا يعافينا كلنا يااااااااااااارب ويتوب علينا قولوا آآآآآآآمين يا مسلمين.

خلينا نشوف بقى المفروض نعمل فيهم ايه الى فاتوا كلهم الخمور والمخدرات ؟؟؟ ده ان شاء الله البوست الى جاي الجزء ا لتاني من شارب الخمر

وجزيتم خيرا عنا