الجمعة، 28 نوفمبر 2008

العلاقه بين الرجل والمرأه الاجنبيين


السلام عليكم ورحمة الله وبركاته

اخواني الكرام :
بناءا على طلب من الاخ الكريم صاحب مدونة خواطر ليس عابره اخترت موضوع الحديث اليوم

وهو ما هى طبيعة العلاقه المشروعه بين رجل وامرأه اجنبيان بمعنى اخر هل يجوز اساسا وجود علاقة بينهم وما مسماها وما ملامحها ومداها وقوانينها طبعا على اساس دينى. .

طبعا كمان انا لازم اقر للجميع انى اقل من افتي فى اي أمر اصلا من امور الدين وان صغر ولكن الاخ الكريم طلب وجهة نظري المتواضعه

نرجع لموضوعنا والي احب ابدأه اولا بالحديث عن الاختلاط نفسه بين الجنسين

والى حواليه كلام كتير جدا ما بين مؤيد ومعارض من حيث الحكم الشرعي طبعا الى احنا بصدد مناقشته هنا

في رأيي ان الاختلاط ليس محرما فلا يوجد نصا قرآنيا ولا من السنه
صريحا يقول بابعاد المرأه عن الرجل فى اي مجال

واحده واحده عليا مش عايزه طوب .

احنا عندنا فى السيره النبويه الشريفه و سيره الصحابه مليون قصه ومليون حدث يقول ان كان فى معايشه بين الجنسين عادي لكن بشروط طبعا وقوانين

واي أحد ينكر هذا اعتقد انه فى حاجه الى قراءه متأنيه للسيره النبويه وسيرة الصحابه .

المهم ندخل على النقطه الاساسيه وهى هل ممكن وجود علاقه

بس اسمها ايه ؟؟؟ وشكلها ايه ؟؟

اسمها مش عارفه... سميها زي ماتسميها
سميها صداقه
سميها اخوه فى الله
سميها حب فى الله

وما حدش يقولي مافيش حاجه اسمها حب فى الله بين رجل وامرأه اجنبيان عشان ده كلام مش مقنع خالص مش اي حب هو عشان نفكر كده .

اما شكل العلاقه

فاحنا والله لو كنا دايما نلتزم بكتاب الله وسنة نبيه والله ما كنا نتعب
الاختلاط بين الرجل والمرأه الاجنبيين والعلاقه بينهم عموما مقننه عندنا
والقونين واضحه وصريحه لو مشينا عليها ما تحصلش اي مشكله

اولا : اللباس الشرعي : طبعا للطرفين(المراه والرجل ) وطبعا احنا مش بصدد مناقشة ما هو اللباس الشرعي كل واحد يلبس الحاجه الى مقتنع انه الشرع والفرض عليه وبعدين نتكلم فى الموضوع ده .

ثانيا : غض البصر : وبرضه من الطرفين سواء كان الطرف التاني
.لابس شرعي ولا لا انت عليك الغض
قال الله تعالى قل للمؤمنين يغضوا من أبصارهم ويحفظوا فروجهم
ذلك أزكى لهم

وقال تعالى
وقل للمؤمنات يغضضن من أبصارهن ويحفظن فروجهن

ثالثا :الحرص من الخلوه : والحرص هنا بمعنى تجنبه ولو حصل يبقى فى اضيق الحدود وينهى الموقف باسر ع وقت
لانه وضع وارد طبعا
فقال رسول الله صلى الله عليه وسلم :لا يخلون أحدكم بامرأة فإن الشيطان ثالثهما
( برواية عبد الله بن عمر مسند احمد )

رابعا :عدم اظهار اللين فى القول من المرأه :

بسم الله الرحمن الرحيــــــــــــم
(( يا نساء النبي لستن كأحد من النساء إن اتقيتن فلا تخضعن بالقول فيطمع الذي في قلبه مرض وقلن قولا معروفا سورة الأحزاب آية 32

اظن دي القوانين المطلوبه

واعتقد انه لا يعقل ان يكون الاختلاط له قوانين وفى نفس الوقت الاختلاط محرم فكين يقنن الحرام ؟؟؟
وبعد كده يأتي دور الرادع والرقيب الشخصي والايماني فمن يجد فى نفسه مجال للفتنه من علاقه او مكان فليبتعد عنها درءا للفتنه
فلكل فتنة تختلف عن غيره بشكل نسبي يعنى ودي نقطه مهم اوي على فكره

خلاصة القول

اي علاقه بين رجل وامرأه تلتزم بالشروط دي تعتبر علاقه مشروعه. (من وجهة نظري المتواضعه )

وعموما يجب ان يكون الحديث بين الطرفين له سماته وشكله المحترم

وده طبعا شيء نسبي وشخصي الى حد ما

طيب لو حبينا نوصف كلامك مع المرأه مثلا كمسلم عايز تحافظ على دينك ؟؟

ايه رايك نقول ان يكون الحديث بينكم حديث يرضاه مولانا ووليها

وانتى كمان كامرأه حطي قاعده اتكلمى مع الرجال كأن وليك حاضر الحديث ده
وارضى ما يرضاه وليك وارفضي ما يرفضه

الولي هنا طبعا ممكن يكون جوزها ابوها اخوها حسب ظروفها .

اتمنى اكون افدتكم فعلا بالموضوع
واسال الله دائما ان يرينا الحق حق ويرزقنا اتباعه ويرينا الباطل باطل ويرزقنا اجتنابه .
ارجو من الجميع مناقشتي واحترام رايي من فضلكم
واسفه للاطاله لكن عارفين كل نقطه فى البوست ده محتاجه لواحدها بوست اصلا
جزاكم الله خيرا بالصبر عليا فى كلامي الكتير

الأحد، 16 نوفمبر 2008

زيارة القبور

موضوع زيارة القبور اثير كثيرا واختلفت فيه الأراء وفى قراءة لى فى كتاب فقه السنه اقنعني هذا الرأي فعمدت الى عرضه عليكم بتصريف مني ان شاء الله
لنتحدث عن حكم زيارة القبور

زيارة القبور مستحبه

لقول رسول الله : كنت نهيتكم عن زيارة القبور فزوروها فإنها تذكركم الآخره.
رواه احمد ومسلم واصحاب السنن

وكان النهي فى البدايه لانهم كانوا قريبوا العهد من الجاهليه وفعلها ولكن لما اطمئن قلوبهم للاسلام سمح لهم بالزياره .
وعن أبي هريره أن النبي زار قبر امه وبكى وابكى الجميع
وقال : استأذنت ربي أن أستغفر لها فلم يؤذن لي واستأذنته أن ازور قبرها فأذن لي فزوروها فإنها تذكر الموت .
رواه احمد ومسلم واهل السنن الا الترمذي

كيفية الزياره

عن عائشه رضى الله عنها قالت : كان النبي كلما كان ليلتها يخرج من آخر الليل إلى البقيع فيقول : السلام عليكم دار قوم مؤمنين اتاكم ما توعدون غدا مؤجلون وإنا إن شاء الله بكم لاحقون اللهم أغفر لاهل بقيع الغرقد . رواه مسلم
اما التمسح بالاضرحه والتبرك بها وتقبيلها والطواب حولها فهو من البدع المنكره ويحرم فعلها
زيارة النساء

رخص مالك وبعض الاحناف ورواية عن أحمد وأكثر العلماء في زيارة ا لنساء للقبور
لحديث عائشه :
انها قالت رسول الله : كيف اقول لهم يا رسول الله ؟ قال : قولي : السلام على اهل الديار من المؤمنين والمسلمين ويرحم الله المستقدمين منا والمستأخرين وإنا ان شاء الله بكم لاحقون .
فهو علمها الزياره ولم يمنعها منها

ويروى عن عبد الله بن أبي مليكه ان عائشه أقبلت ذات يوم من المقابر فقلت : يا أم المؤمنين من أين اقبلت؟ قالت : من قبر أخي عبد الرحمن . فقلت لها : أليس كان نهى رسول الله عن زيارة القبور ؟ قالت نعم . كان نهى عن زيارة القبور ثم أمر بزيارتها
رواه الحاكم والبيهقي

وفي الصحيحين عن أنس ان رسول الله صلى الله عليه وسلم مر بامرأه عند قبر تبكي على صبي لها فقال لها : اتقي الله واصبري . فقالت : وما تبالي بمصيبتى

فلما ذهب قالو لها انه رسول الله فذهب اليه فقالت يا رسول الله : لم اعرفك . فقال لها انما الصبر عند الصدمة الاولى

والاستدلال هنا انه رأى المراه على القبور ولم ينهها او ينكر ذلك عليها ولكن امرها بالصبر

وبعض الناس كره زيارة النساء للقبور لقله صبرهم وكثرة جزعهن

اما قول رسول الله صلى الله عليه وسلم : لعن الله زورات القبور .

يقول القرطبي فى هذا : انما اللعن المذكور في الحديث هو للمكثرات من الزياره لما تقتضيه من الصيغه المبالغه .
(فكلمة زوارات هى صيغة مبالغه )

وقال ان تذكر الموت يحتاج اليه النساء والرجال .
وقد قال يجب ان نأمن من النساء النحيب والصوت والمبالغه.
وعليه فاننا عموما رجالا ونساءا امرنا بزيارة القبور فنحن رجالا ونساءا نحتاج الى التذكره بالاخره كما قال رسول الله
فليست التذكره قاصره على الرجال .
والنحيب والصوات والمبالغه فى ذلك على القبور مرفوض من الجميع طبعا
جزاكم الله خيرا بقراءتكم الموضوع ونفعنا واياكم بصالح الاعمال واتمنى ان اكون أفدتكم بهذا البحث المتواضع

الأربعاء، 5 نوفمبر 2008

ام سلمه(هند بنت ابى اميه بن المغيره)


وهى قريشيه مخزوميه واشتهرت باسم ام سلمه بنت زاد الركب
طب ليه سموها كده زاد الركب دى شهره ابوها لانه كان مشهور جدا بالكرم وكان اذا سافر فى ركب مع مجموعه يعنى يكفيهم من الزاد طول السفر ولا يدع احد من الركب يحمل معه زاد فسموه زاد الركب
اما بقى ام سلمه فطبعا لانها اكيد عندها ولد اسمه سلمه انجبته من زوجها عبد الله بن اسد بن المغيره وهو ابن بره بنت عبد المطلب عمه الرسول
وكمان عبد الله كان اخا للرسول فى الرضاعه وكان من المسلمين الاوئل هو وزوجته هند وهاجرت مع زوجها للحبشه فى هجره المسلمين الاولى و انجبت هناك ابنها سلّمه
وبعدين رجعت تانى لمكه مع زوجها وبعدين استعدوا للهجره للمدينه مع باقى المسلمين لكن حصلهم قصه مؤلمه وصعبه جدا اايه بقى الى حصل:

جهزوا الركوبه وركبت ام سلمه وابنها وساق البعير ابو سلمه وبعدين شافوهم بنى المغيره اهل ام سلمه فراحوله وقالولوا انت حر فى نفسك عايز تهاجر روح انما زوجتك قريبتنا ومن حقنا نحميها منك ونمنعها من الهجره معك
وخدوا منه ام سلّمه فعلا فمين بقى الى اعترض بنو عبد الاسد اهل ابو سلمه وقالوا لا اذا اخذوها ناخذ ابننا وفضلوا يتخانقوا على سلمه لحد ما ايده كانت هتتخلع بينهم و خدوه فى الاخر بنى عبد الاسد
وهى كانت عند اهلها حبسوها فى مكه وفضلت تبكى ام سلمه الى جرالها من اهلها سنه كامله لحد ما اهلا رافوا بيها وقالوا لها الحقى بزوجك
وكان هو ذهب للمدينه وساعتها وافق بنى اسد انهم يعطوها ابنها وسافرت فعلا للمدينه وصاحابها فى الرحله عثمان بن طلحه لما لقاها مسافره لواحدها
وهى بعد كده قالت فيه: فا والله ما صاحبت رجلا من العرب قط ارى انه كان اكرم منه. هو على فكره لما لقاها مسافره سالها اذاكان معاها حد قالت الله وولدى هذا
فقال: والله ما لك من مترك.يعنى ما يصحش يسيبها لوحدها
وهى حكت ان كان كل ما يحب يقف فى الطريق ينخ الجمل ويبعد بعيد لحد ما تنزل بعدين يرجع يربط الجمل ويركن الى شجره بعيد عنها وبعدين يرجع لما يحب يمشوا يقدم الجمل ويبعد لحد ما تركب وبعدين ياخد اللجام ويمشى وهكذا وعلى فكره ده كان قبل ما يدخل فى الاسلام كمان شفتم اخلاق العرب عشان الناس الى بيقولوا همج وبدو والكلام التعبان ده
كان عندهم نخوه واخلاق ما عادتش عندنا للاسفه يمكن الاخ ما عادش يهمه اخته تروح ولا تيجى ولا تسافر ولا تجوع حتى .
المهم ام سلمه لما راحت المدينه ما كانوش مصدقينها انها بنت زاد الركب لان ده كان نسب عالى جدا فكانوا مكذبنها لحد ما جه موسم الحج فبعتت معاهم رساله لاهلها فصدقوها بقى وانجبت فى المدينه من ابو سلمه عمر ودره وزينب وبعدين ابو سلمه مات ودار بينه وبين ام سلمه حديث جميل ايه رايكم نشوف قالوا ايه :

قالت ام سلمه بلغنى انه ليس امرأه يموت زوجها وهو من اهل الجنه ثم لم تتزوج الا جمع الله بينهما فى الجنه فتعال اعاهدك الا اتزوج بعدك.
قال ابو سلمه:اتطيعينى؟
قالت: نعم
قال: اذا مت تزوجى اللهم ارزق ام سلمه بعدى رجلا خيرا منى لا يحزنها ولا يؤذيها .
ولما مات ابو سلمه احتسبت ام سلمه مصيبتها عند ربنا وقالت ان لله ان الهي راجعون اللهم انى احتسب مصيبتى في ابى سلمه عندك اللهم ابدلنى خيرا منه ثم قالت فى نفسها ومن خيرا من ابى سلمه.

وبعدين لما جه رسول الله وخطبها فقالت ايه بقى: انا مصبيه(يعنى عندها صبيه) وانا غيوره وانا كبيره السن فلم بلغ رسول الله ما قالت قال: اما كبر السن فانا اكبر واما الغيره ادعو الله ان يذهبها عنها واما العيال فالى الله ورسوله.
واتزوجت من الرسول عليه الصلاه والسلام فعلا وكانت لها منزله فى نفسه لم تنزلها اى واحد من زوجاته بعد عائشه فكانت منزلتها تقارب عائشه عشان كده كانت عائشه بتغير منها جدا وكانت ام سلمه شخصيتها قويه جدا ولها مواقف كتير تثبت كده هاحاول اقول اكترها زى ايه:

كان فى مره مشكله بين الرسول وزوجاته حول النفقه فى بيت النبى المهم الرسول يومها كان مضايق و ما خرجش يصلى بالمسلمين فدخل له ابو بكر وبعده عمر وعرفوا ان الموضوع متعلق بالنفقه فكل واحد فيهم حاول يخفف عن الرسول عليه الصلاه والسلام بالمزاح معاه
وبعدين ابو بكر عنف بنته على انها مزعله الرسول وزيه عمل عمر ابن الخطاب ابو مين?? حفصه اوعى تنسى
المهم وبعدين لسه يا دوب جاين يكلموا ام سلمه قالت لهم ايه بقى:ما لكما ولما هاهنا ! رسول الله اعلى بامرنا عينا ولو اراد ان ينهانا لنهانا فمن نسأل ان لم نسال رسول الله؟

ناس جامدين الصراحه
طبعا بعد الكلام ده خرجوا الاثنين من غير ولا كلمه وطبعا فرحوا اوى زوجات الرسول وشكروها على وقفتها دى.

كمان فاكر قصه حفصه لما عرف ابوها نها تراجع الرسول فيما يقول وراح يعاتبها على كده خرج من عنده وراح لام سلمه لانها كانت قريبته( وعلى فكره لحد الوقت الى بنتكلم فيه كان لسه الحجاب لم يفرض على النساء) وسالها على مراجعه زوجات النبى له فقالت له : عجبا يا بن الخطاب قد دخلت فى كل شىء حتى تبتغى ان تدخل نفسك بين رسول الله وازواجه.
طبعا دى كانت اخر مره يتكلم فى الموضوع ده.

اما بقى عن غيره ام سلمه على الرسول فحصل منها مواقف لذيذة اوى منها: كان الرسول خارج للسفر و واخد معاه ام سلمه وصفيه ( وعلى فكره كان بيختار الى تسافر معاه من زوجاته بالقرعه بينهم) المهم فراح الرسول وهو فى الطريق ناحيه هودج صفيه وكان فاكره لام سلمه وكلمها بعدين لما عرف انها صفيه مشى راح للهودج التانى لام سلمه هى بقى من غيرتها اندفعت على طول وقالتله: تتحدث مع ابنه اليهودى فى يومى يا رسول الله؟ بس بعد كده زعلت من نفسها واعتذرت لرسول الله واستغفرت ربنا.

كمان ام سلمه كانت مشهوره برجاحه العقل والذكاء فى الموضوع ده لنا برضه موقف جميل.
كان الرسول عليه الصلاه والسلام خرج واصحابه فى السنه السادسه الهجريه الى مكه قاصدين حج البيت ولكن قريش اعدت لهم العده وارسلت لهم الرسل لاستبيان الموقف وعرفوا منهم انهم ما جاؤا الا للحج فقط لكنهم رفضوا برضه
وبعدين عقد الرسول معهم هدنه ووقف القتال على ان يعودوا العام القادم لاداء الحج فى نفس الميعاد وكان ده صلح الحديبه وكان اكتر المسلمين مش راضين عليه واعتبروه مهانه لهم
لكن بعد مرور الوقت اكتشفوا ان كان خطوه عظيمه
المهم امر ارسول المسلمين انهم ينحروا هديهم ويحلقوا رؤسهم لانهم كانوا محرمين لكنهم تباطؤا فى ذلك الى ان غضب الرسول جدا وخشى على المسلمين من الفتنه والتفرق
ودخل لام سلمه وحكى لها ما كان من امر المسلمين فهدأت من نفسه ام سلمه وقالت لهيخرج ولا يكلم احد ويذبح هديه ويحلق ر اسه وعمل الرسول زى ما قالت له فعلا وبعدها اتكسف المسلمين بقى من نفسهم وعملوا زى ما الرسول عمل واتحلت المشكله

وعاشت ام سمله بعد وفاه الرسول كتير وكانت اخرهن موتا وماتت ويقال انها حضرت مذبحه كربلاء وبعدها ماتت نبقى نتكلم عن مذبحه كربلاء فى يوم تانى ان شاء الله وكانت من اكبر رواه الحديث

دفنت فى المدينه فى البقيع مع باقى زوجات النبى .

رحمها الله ورضى عنها وارضاها