الحكمة

السلام عليكم

مقصره فى حق الرؤيه الاسلاميه وبانب فى نفسي بقالي كتير والله

بس غصب عني موضوعات الرؤيه بتحتاج شغل شويه ووقت

نشوف النهارده بقى هانتكلم عن الحكمه ان شاء الله وهانقول ايه :

يؤتي الحكمة من يشاء ومن يؤت الحكمة فقد اوتي خيرا كثيرا وما يذكر الا اولوا الالباب
سورة البقرة- آية 269

حبيت ابدأ الموضوع بالاية الكريمه دي والى فيها معن جميل اوي لمن يتأملها
مكانة الحكمة

طيب اولا يعنى ايه حكمه :
الحكمة المعرفة الجيده بالأمور وفهمها كما يجب والراي الصائب والمقدره على وضع الأمور في نصابها الصحيح والتحدث بما هو صحيح والعمل به فعلا .

يا ترى اية هي مكانة الحكمه فى القرآن وعند ربنا سبحانه وتعالى وايه اهميتها ؟

شايفين الايه فوق بتقول ايه ؟

بتقول يؤتي الحكمة من يشاء

بتتكلم عن الحكمه على اساس انها هبه وعطيه من الله سبحانه وتعالى
بس شوفوا اتبعت بايه ومن اوتي الحكمه فقد اوتي خيرا كثيرا

طيب وباقي النعم الى ربنا اعطاهالنا ؟؟

شوفوا كده الايه دي

وَمَا أُوتِيتُم مِّن شَيْءٍ فَمَتَاعُ الْحَيَاةِ الدُّنْيَا وَزِينَتُهَا وَمَا عِندَ اللَّهِ خَيْرٌ وَأَبْقَى أَفَلا تَعْقِلُونَ

كل حاجه حلوه ربنا ادهالك من متاع الدنيا وزينتها يبقى دائما صغير لما نقارنه بما هو عند الله

طيب والايه دي

المال والبنون زينة الحياة الدنيا والباقيات الصالحات خير عند ربك ثوابا وخير املا

برضه نفس المعنى تقريبا

طيب والملك والسلطان والعز ؟؟؟

قل اللهم مالك الملك تؤتي الملك من تشاء وتنزع الملك ممن تشاء وتعز من تشاء وتذل من تشاء بيدك الخير انك على كل شيء قدير

خير قال ربنا انه انه خير بايد ربنا

انما الحكمه ؟

خيرا كثيراااااااا

يؤتي الحكمة من يشاء ومن يؤت الحكمة فقد اوتي خيرا كثيرا وما يذكر الا اولوا الالباب
سورة البقرة- آية 269

بس ايه ؟
وما يذكر الا اولوا الالباب



طيب خلونا نستعرض ورود كلمة الحكمه فى القرآن ونعرف مكانتها اكتر


الحكمه ذكرت فى القران كثيرا ولكن فى الاغلب كان ذكرها مرتبط بحاجتين الانبياء و الكتب السماويه

ولكن فى غير اقتصار عليهم فهو يؤتي الحكمه من يشاء مش الانبياء فقط يعنى


هانشوف ده من خلال الايات

الايه دي على سبيل المثال :

لقد من الله على المؤمنين اذ بعث فيهم رسولا من انفسهم يتلو عليهم اياته ويزكيهم ويعلمهم الكتاب والحكمة وان كانوا من قبل لفي ضلال مبين
سورة آل عمران - آية 164



الحكمه اقترنت بالكتاب ( السماوي )فى القرآن بالظبط 9 مرات ودي مكانه واضحه للحكمه



خلينا نشوف كمان ذكرت الحكمه فين واعتبرت فضل الله تعالى على انبياؤه

لما نتكلم عن داود فى الايتين دول

فهزموهم باذن الله وقتل داود جالوت واتاه الله الملك والحكمة وعلمه مما يشاء البقرة


وشددنا ملكه واتيناه الحكمة وفصل الخطاب سورة ص


وزي ما قرن الحكمه مع الكتاب والنبوه دايما فى الايات الى اتكلمنا عنها
في الايه دي ومع داود قرن بينها و الملك

لا مش الملك بس الملك القوي الشديد الى ربنا قواه فعلا ليصبح ملك عظيم الى هو كان ملك داود عليه السلام

وربنا كمان وهبه ايه بعد الملك القوي الحكمة اصلها حاجه مهمه اوي وكبيره اوي

وفصل الخطاب : الى هو تمييز الكلام الصح من الخطأ والتحكيم بين الناس برضه ياريت نلاحظ المكانه دي لفصل الخطاب



شوفوا كمان الحكمه جائت على لسان عيسى عليه السلام ازاي

ولما جاء عيسى بالبينات قال قد جئتكم بالحكمة ولابين لكم بعض الذي تختلفون فيه فاتقوا الله واطيعون الزخرف




كمان خلينا نشوف كمان الايه دي


ذلك مما اوحى اليك ربك من الحكمة الاسراء

ودي كانت بعد اوامر الاهيه طووويله كلنا يمكن نعرفها بداية من

وَقَضَى رَبُّكَ أَلاَّ تَعْبُدُواْ إِلاَّ إِيَّاهُ وَبِالْوَالِدَيْنِ إِحْسَانًا

وباقي قائمة الأوامر الى وردت فى الايه دي

وختمت الأوامر أو النصائح بانها وحي بالحكمه من الله عز وجل

ودي المكانه الى بتوضع فيها الحكمه دايما من الله

دايما ربنا بيتكلم عن الحكمه على انها هبه عظيمه الشأن يهبها لعباده الصالحين زي الهبه الى ربنا بعتها للقمان

ولقد اتينا لقمان الحكمة ان اشكر لله ومن يشكر فانما يشكر لنفسه ومن كفر فان الله غني حميد لقمان

اغنانا وغناكم الله من فضله ان شاء الله

نسأل الله تعالى ان يرزقنا الحكمه واياكم

واتمنى اكون افدتكم فعلا

وما اكونش طولت عليكم

قصة خلق آدم عليه السلام (عرض باور بوينت للاطفال)

السلام عليكم

جايبالكم النهارده حاجه خفيفه كده وجميله

هديه مني لولادكم وحبايبكم وعايزه اعرف رايكم كده ايه

عشان اكمل السلسله ولا ايه

هو عرض باور بوينت لقصة خلق آدم عليه السلام

الكتابه مش ليا لاستاذنا عبد الحميد جوده السحار

لكن انا الى عملته داخل باور بوينت واتمنى انه يعجبكم ان شاء الله

انا رفعته على الوصله دي حملوه من هنا

وابقوا قولولي رايكم بقى

مبطلات الصوم

سلام عليكم
بما اننا فى رمضان وكل سنه وانتم طيبين انا قلت اكتبلكم بعض احكام الصيام الى ممكن تنفعكم ان شاء الله فى رمضان

انا كنت قبل كده اتكلمت عن رمضــــان و الصيـــام

وان شاء الله النهارده نتكلم عن مبطلات الصوم

هانقسم مبطلات الصوم الى قسمين

الاول : وهو ما يبطل الصوم ويوجب القضاء فقط (يعنى يصوم يوم بدل اليوم ده بعد رمضان )
وهو

1-الاكل والشرب عمدا

لان طبعا لو كان ناسي ليس عليه كفاره بيكلم يومه عادي

زي ما قال رسول الله صلى الله عليه وسلم
من أكل ناسيا ، وهو صائم ، فليتم صومه ، فإنما أطعمه الله وسقاه
الراوي: أبو هريرة المحدث: البخاري - المصدر: صحيح البخاري - الصفحة أو الرقم: 6669خلاصة الدرجة: صحيح

2- القيء عمدا:

لو كان القيء غصب عنه لا يوجب القضاء ولا يبطل الصوم اصلا وبيتم صومه عادي
انما لو كان القيء عمدا يبطل الصوم ويوجب القضاء
لان الرسول عليه الصلاة والسلام قال
من استقاء عامدا فعليه القضاء ومن ذرعه القيء فلا قضاء عليه
الراوي: أبو هريرة المحدث: ابن العربي - المصدر: عارضة الأحوذي - الصفحة أو الرقم: 2/179خلاصة الدرجة: صحيح

3- الحيض والنفاس : ولو حاضت المرأه مثلا قبل الغروب بدقيقه فيبطل صيامها وتعيد اليوم تاني مع باقي ايام الحيض طبعا او النفاس

4- الاستمناء : بشرط يكون الشخص عمد الى ذلك . يعنى استمنى بالقصد وسعى اليه . اما اذا حصل الانزال بدون اي تدخل منه بحلم مثلا او حتى لمجرد النظر فده لا يبطل الصوم ولا يوجب شيء وكذلك المذي لا يبطل الصيام .

5- اي شيء ينزل الجوف عمدا حتى لو لم يكن طعام ده يبطل الصوم ويوجب القضاء

6- من نوى الفطر : حتى لو ما فطرش فعلا لكن نوي انه يفطر كده راح عليه صيام اليوم ده ويجب عليه القضاء لان النيه ركن من اركان الصيام
7- اذا اكل او شرب او جامع ويظن ان المغرب حان او ان الفجر لم يأذن بعد فعليه القضاء عند جمهور العلماء
(الا ان فى بعض الاراء بتقول انه مافيش عليه قضاء كمان وده لو ادخلنا ده تحت بند السهو والخطأ المرفوع عننا )

ثانيا : ما يبطل الصوم ويجب القضاء والكفاره

وحاجه واحده بس الى توجب ده عند جمهور الفقهاء وهو الجماع فى نهار رمضان

وخلينا نقول موقف مع الرسول نفهم منه الموضوع

جاء رجل إلى رسول الله صلى الله عليه وسلم فقال : هلكت ، فقال : ( وما ذاك ) . قال : وقعت بأهلي في رمضان ، قال : ( تجد رقبة ) . قال : لا ، قال : ( فهل تستطيع أن تصوم شهرين متتابعين ) . قال : لا ، قال : ( فتستطيع أن تطعم ستين مسكينا ) . قال : لا ، قال : فجاء رجل من الأنصار بعرق - والعرق المكتل - فيه تمر ، فقال : ( اذهب بهذا فتصدق به ) . قال : أعلى أحوج منا يا رسول الله ؟ والذي بعثك بالحق ، ما بين لابتيها أهل بيت أحوج منا ، ثم قال : ( اذهب فأطعمه أهلك ) .
الراوي: أبو هريرة المحدث: البخاري - المصدر: صحيح البخاري - الصفحة أو الرقم: 6710خلاصة الدرجة: [صحيح]

دي الروايه بالنص نحكيها بقى بالراحه عشان نفهمها

واحد راح للرسول عليه الصلاة والسلام وقاله الحقنى انا جامعت زوجتي فى رمضان
فقال له الرسول ان يعتق رقبه عبد من العبيد او يصوم شهرين متتابعين او يطعم ستين مسكينا
لكن الرجل قال انه ما يقدرش يعمل كل ده
فالرسول اعطاه عرق بلح ( العرق يعنى 15 صاع والصاع ده مكيال زي الكيلو وكده ما علينا ) قاله اتصدق به

فالرجل قاله مافيش حد فى المدينه كلها افقر مننا
فالرسول ضحك وقاله اطعمه اهل بيتك .

الحديث ده فيه نقط مهمه جدا
اولا: حكم من جامع زوجته فى نهار رمضان هو القضاء والكفاره والكفاره الى هى عتق رقبه او صيام شهرين متتاليين او اطعام ستين مسكينا

ثانيا : سقوط الكفاره عن الشخص الى فعلا مش قادر عليها (الا ان فى بعض الاراء برضه بتخالف الراي ده)

ثالثا : هو ان هل الكفاره تجب على الزوجه كمان ؟
الحقيقه الموضوع فيه الرايين
فى راي بيقول لو كانت الزوجه مجبره فلا عليها كفاره ولكن عليها القضاء وانما لو كانت مختاره ومتعمده هى كمان تجب عليها ايضا القضاء والكفاره

وفى راي تاني بيقول ان مجبره كانت اولا فهما الاثنين عليهم كفاره واحده بيقضيها الزوج وده راي الشافعي واستناده للحديث السابق حيث ا ن الرسول لم يشير الى ان الزوجه كمان عليها كفاره .

ويارب اكون انا كلامي سهل عليكم وما اكونش طولت عليكم وافدتكم فعلا و كل سنه وانتم طيبين وربنا يتم عليكم رمضان بالخير ان شاء الله

والمره الجايه ان شاء الله هانتكلم عن احكام قضاء رمضان

اه وعلى فكره مرجعي فى الموضوع ده هو كتاب فقه السنه للسيد سابق لو حد حب يقرا اكتر

آية الزواج

فى الحقيقه يا جماعه انا اخترت النهارده اتكلم عن الزواج

مش من الناحيه الشرعي ولا احكامه ولا كل ده انما من جانب مختلف ورؤيه شخصيه زي ما انتم عارفين طريقتى

الزواج ده نظام اجتماعي قننه الشرع
يعنى ايه ؟يعنى اساسا الزواج كان موجود من قبل الاسلام لكن كان فى اخطاء وعادات كتير غلط وجه الاسلام حط قوانين للنظام الاجتماعي ده ونظمه .

طيب بعد اذنكم عايزه اتكلم من خلال الايه دي شويه

ومن اياته ان خلق لكم من انفسكم ازواجا لتسكنوا اليها وجعل بينكم مودة ورحمة ان في ذلك لايات لقوم يتفكرون

سورة الروم - سورة 30 - آية 21

معلش ركزوا بقى معايا وتعالوا ناخدها حته حته

ومن آيته ان خلق لكم من انفسكم ازواجا : الايه معتبره فكرة وجود ازواج دي آيه من ايات الله فى خلقه معجزه يعنى (والازواج هنا من الجنسين يعنى )

ازواجا لتسكنوا اليها : شوفوا السبب من وجود الازواج ايه السكنــــى

يعنى ايه سكنى : لما نقول سكن الشيء يعنى استقر مكانه السكنى هنا استقرار واطمئنان وهدوء نفسي

وجعل بينكم مودة ورحمه : هنا بقى الحقيقه انا وقفت قدام الكلمه دي شويه كده شمال ويمين وكلمة جعل خصوصا
بنلاقيها دايما مذكوره فى القرآن مع المسلمات والافعال الالهيه زي وجعلنا الارض مدادا .... مثلا


والايه دي كمان حتى فى اقران بين خلق السموات والارض والازواج على اعتبار ان وجود الازواج منحه الاهيه برضه

فاطر السماوات والارض جعل لكم من انفسكم ازواجا

سورة الشورى - سورة 42 - آية 11

نرجع للايه الاولى بتاعتنا
وجعل بينهم موده ورحمه .... وكانها منحه الاهيه .. الى هى ايه المنحه ؟ الموده والرحمه
يعنى دي موجوده بامر الله بس احنا الى مش بنقدرها ولا بنراعيها ابدا احنا بنهملها جايز بننساها بنبوظها اي حاجه بقى
الموده والرحمه : والله العظيم موده ورحمه مش خناق وعراك ومحاكم وحرب اهليه فى البيوت

وفى نهاية الايه بقى بيقول : ان فى ذلك لايات لقوم يتفكرون

يتفكرون عشان خاطري تتفكرون شويه وتعرفوا يعنى ايه زواج وعشان ايه

وفى ايه تانيه برضه ذكر فيهاالزواج لكن تعالوا نقرا الايه كده وقلولي حاسين ايه من معناها

والله جعل لكم من انفسكم ازواجا وجعل لكم من ازواجكم بنين وحفدة ورزقكم من الطيبات افبالباطل يؤمنون وبنعمت الله هم يكفرون
(5)

سورة النحل - سورة 16 - آية 72

الايه بتعد بعضا من نعم ربنا عليكم الى المفروض نشعر بها بالامتنان لله عز وجل
شايفين عدوا كده

جعل لكم من انفسكم ازواجا

ومش بس كده كمان من ازواجكم رزققكم اولاد

ومن الاولاد احفاد

خلاص بيقيتوا قبيله ؟

طيب ورزقكم بالطيبات كمان عشان تعيشوا وتستمتعوا بحياتكم
وبعد ما ربنا عد لنا جزء من نعمه

الايه بتسالنا بعد كله ده وبتعجب : افبالباطل يؤمنون وبنعمت الله هم يكفرون

شايفين القرآن ازاي بيصور الزواج والازواج كنعمه من نعم ربنا علينا ؟

واحنا من اول ما يقابلنا مشكله فى حياتنا نقعد نردد الاسطوانه اياها بتاعة يجى الى عايز يتجوز يشوف
ما كنا حلوين بلا جواز بلا قرف
وكلمه بيقولها جايز بهزار وجايز بجد
وجايز فى وقت هو فيه مضايقه
اوعى تتجوز يا ابنى خليك كده فى هوى نفسك بلاش وجع قلب ادينى باقول يا ريت الى جرى ما كان
وهى تقول ما تستعجليش يا اختي على الجواز بكره تتجوزي وتقولي ولا يوم من ايام بيت اهلي تروحي تجيبى واحد يتحكم فيكى ويقرفك
لييييييييييه مين بس قال كده
جايز المتجوزين بيقولوا الكلام ده كده هزار جايز جد جايز هما فاشلين فى حياتهم
بس حرام عليهم ومش من حقهم ابدا يسودوا الدنيا فى عين الشباب
عشان فعلا الكلام ده بياثر عليهم وحقيقى بقت مشكلة العنوسه تكاد تكون فى حالات كتير هى عزوف عن الزواج مقنع غير العزوف الصريح كمان ودي مشكله كبيره بيتولد منها مشاكل اكبر وابشع لاتخفى على حد ابدا

الرسول عليه الصلاة والسلام قال :
الدنيا متاع . وخير متاعها المرأه الصالحه .
رواه مسلم عن عبد الله بن عمرو بن العاص

وقال كمان

ثلاث من السعادة ، و ثلاث من الشقاوة ، فمن السعادة : المرأة تراها تعجبك ، و تغيب فتأمنها على نفسها و مالك ، و الدابة تكون وطيئة فلتلحقك بأصحابك ، و الدار تكون واسعة كثيرة المرافق و من الشقاوة المرأة تراها فتسوؤك ، و تحمل لسانها عليك ، و إن غبت عنها لم تأمنها على نفسها و مالك ، و الدابة تكون قطوفا ، فإن ضربتها أتعبتك ، و إن تركتها لم تلحقك بأصحابك ، و الدار تكون ضيقة قليلة المرافق

الراوي: سعد بن أبي وقاص المحدث: الألباني - المصدر: السلسلة الصحيحة - الصفحة أو الرقم: 1047خلاصة الدرجة: حسن

اقروا الحديث ده وحاولوا توصلوا للثلاث حاجات الى فيه او بعضهم واحمدوا ربنا واشكروا فضله ولو لقيتوا نفسكم مش سعداء يبقى المشكله فيكم بقى

ولو ما قدرتوش توصلوا لهم جميعا برضه احمدوا ربنا واشكروا فضله واسعوا فى مناكبها لحد ما ربنا يرزقكم
وربنا يكرمكم جميعا ويوسع عليكم ويرزقكم الازواج الصالحين لو ما كانش عندكم
ويبارك لكم ويصلح ما بين اديكم لو كان عندكم ازواج

شكرا لكم ويارب ما اكونش تقلت عليكم

حكم الشذوذ الجنسي فى الاسلام

السلام عليكم
فى الحقيقه من فتره دخلت مدونه اخت كريمه اتكلمت عن مشكلة المثليه الجنسيه فى الاناث
او زي ما انا باحب اعبر عنها الشذوذ الجنسي

وفى الحقيقه اهالني ردود الناس الى بعضه قال ان مافيش نص بتحريم السحاق
حتى ان الاخت الكريمه المدونه كمان قالت انها بتقر ان السحاق حرام ولكن مافيش نص بتحريمه

فى الحقيقه انا طبعا حبيت ادور فى الموضوع اكتر وان كنت عارفه فعلا ما ورد فيه لكن برضه للتاكيد وقبل ما اتكلم فيه
واتفضلوا معايا نشوف الى انا وصلت له

اولا وباديء ذي بدئ احنا اساسا محرم علينا النظر لعورات بعض بموجب الحديث ده

لا ينظر الرجل إلى عورة الرجل . ولا المرأة إلى عورة المرأة . ولا يفضي الرجل إلى الرجل في ثوب واحد . ولا تفضي المرأة إلى المرأة في الثوب الواحد . وفي رواية : مكان عورة عرية الرجل وعرية المرأة .
الراوي: أبو سعيد الخدري المحدث: مسلم - المصدر: المسند الصحيح - الصفحة أو الرقم: 338خلاصة الدرجة: صحيح

وده النظر فقط فما بالك اللمس والاستمتاع وما الى ذلك من الافعال المحرمه الى بيتضمنها السحاق او اللواط كمان

النقطه الى بعد كده فى الحقيقه فى آيه فى القرأن تحديدا فى سورة النساء
الى هى الايه دي

وَالَّلاتِي يَأْتِينَ الْفَاحِشَةَ مِن نِّسَائِكُمْ فَاسْتَشْهِدُواْ عَلَيْهِنَّ أَرْبَعَةً مِّنكُمْ فَإِن شَهِدُواْ فَأَمْسِكُوهُنَّ فِي الْبُيُوتِ حَتَّىَ يَتَوَفَّاهُنَّ الْمَوْتُ أَوْ يَجْعَلَ اللَّهُ لَهُنَّ سَبِيلاً

واعقبتها على طول الايه دي

وَاللَّذَانَ يَأْتِيَانِهَا مِنكُمْ فَآذُوهُمَا فَإِن تَابَا وَأَصْلَحَا فَأَعْرِضُواْ عَنْهُمَا إِنَّ اللَّهَ كَانَ تَوَّابًا رَّحِيمًا

والحقيقه انا طول عمري اقرا الايه دي وعندي قناعه شخصيه ان المقصود بها السحاق واللواط لان الايتين حكمهم مختلف ووردت للمؤنث على حده وللمذكر على حده وعليه انا شايفه ان المقصود بها كده

الا ان فى اراء تانيه بتقول ان ده كان حكم تدريجى للزنا

والحقيقه انا باقول اينعم هو كان حكم تدريجى للزنا لكن برضه على اد فهمي انا قلت فى البدايه هنا حرم السحاق وفعل قوم لوط

لانهم اساسا مرفوضين من المجتمع عموما لانهم ضد الفطره ومهما قال دعاة الحريه هايفضل المجتمع نفسه رافض الفكره واي مجتمع على فكره حتى المجتمع الامريكى

فهنا انزل التحريم للسحاق وفعل قوم لوط

واعقبه بعد كده تحريم الزنا كمان بين رجل وامرأه
وقريت راي عجبنى جدا
نشوفه مع بعض

يقول فضيلة الشيخ السيد سابق في كتابه القيم «فقه السنة ج 2» في باب الحدود:
ونرى ان الظاهر ان آيتي النساء 15/16 تتحدثان عن حكم السحاق وفعل قوم لوط وحكمهما يختلف عن حكم الزنى المقرر في سورة النور، والمعنى اي النساء اللاتي يأتين الفاحشة وهي السحاق الذي تفعله المرأة مع المرأة فاستشهدوا عليهن اربعة من رجالكم فإن شهدوا بالواقعة فاحبسوهن في البيوت بأن توضع المرأة وحدها بعيدة عمن كانت تساحقها حتى تموت او يجعل الله لهن سبيلا الى الخروج بالتوبة او الزواج المغني عن المساحقة



بالنسبه لمن ياتون فعل قوم لوط فامره محسوم كما ورد فى الحديث الصحيح

من وجدتموه يعمل عمل قوم لوط فاقتلوا الفاعل والمفعول به

الراوي: - المحدث: الإمام أحمد - المصدر: تنقيح تحقيق التعليق - الصفحة أو الرقم: 3/302خلاصة الدرجة: صحيح


وبالنسبه للسحاق هو حرام لا محاله ولكن لا يقام عليهم الحد ولا عقوبتهم القتل

ولكن ما ننساش ابدا ان القرآن وصف الفعله دي بالفحش
وشوف قال القرأن ايه عن الفحش اعاذنا واعاذكم الله

قل انما حرم ربي الفواحش ما ظهر منها وما بطن والاثم والبغي بغير الحق وان تشركوا بالله ما لم ينزل به سلطانا وان تقولوا على الله ما لا تعلمون
(10)

سورة الأعراف - سورة 7 - آية 33

اعاذنا واعاذكم الله من الفاحشه واهلها

وشوف كمان الايتين دول والى وردوا بعد الآتين الى فاتوا فى سورةالنساء شوف الايه وجمالها بتقول ايه

إِنَّمَا التَّوْبَةُ عَلَى اللَّهِ لِلَّذِينَ يَعْمَلُونَ السُّوءَ بِجَهَالَةٍ ثُمَّ يَتُوبُونَ مِن قَرِيبٍ فَأُولَئِكَ يَتُوبُ اللَّهُ عَلَيْهِمْ وَكَانَ اللَّهُ عَلِيمًا حَكِيمًا
وَلَيْسَتِ التَّوْبَةُ لِلَّذِينَ يَعْمَلُونَ السَّيِّئَاتِ حَتَّى إِذَا حَضَرَ أَحَدَهُمُ الْمَوْتُ قَالَ إِنِّي تُبْتُ الآنَ وَلاَ الَّذِينَ يَمُوتُونَ وَهُمْ كُفَّارٌ أُوْلَئِكَ أَعْتَدْنَا لَهُمْ عَذَابًا أَلِيمًا

بمعنى ان حتى من وقع فى المعصيه له منفذ

لنا التوبه الى الله تعالى ارحم الراحمين نقف على بابه دون كلل او ملل فان فتح بابه كنا اول المقبولين

انا اتكلمت باختصار شديد عن الموضوع لانى مش عايزه ادخل فى كلام كتير

وطبعا العقوبات الى اتكلمنا عليها دي فى حال ان الحالات فرديه انما فى حال شيوع الفاحشه الموضوع بيكون مختلف عشان كده الحكم متروك مفتوح للقاضي

يعنى مثلا فى قوم لوط والى هلكوا جميعا نساءا ورجال ويقال ان كان نسائهم يمارسون السحاق ايضا
فربنا اهلكهم جميعا اعاذنا الله واياكم

وفى النهايه يا اخواني احب ا نبه الى ان الفطره الى ربنا فطرنا عليها ما نقدرش نغيرها ولو غيرناها فى هلاك على المستوى الشخصي والعام كمان وعلى المستويين قصير المدى وبعيد المدى

وارجوكم ناخد بالنا من الاطفال خصوصا فى فترة الطفوله المتاخره لانها فترة تشكل الميول والاتجاهات واي تشوهات فى الفتره دي سواء بالصحبه السيئه للاطفال او بالاعتداء الجنسي بتكون هى السبب فى انحرافات السلوك الجنسي فيما بعد
وكمان يرحمكم الله نعمل زي ما قال بن حنبل اظن :
نفسك .. انم لم تشغلها بالحق شغلتك بالباطل

ونستعين بالصبر والصلاه
والصيام والعباده يا اخواني
واوصيكم ونفسي بتقوى الله
ارجو ان اكون اضفت لكم وافدتكم فعلا

فضل الوضوء

السلام عليكم

النهارده حبيت اكلمكم عن فرض مهم جدا

وهو الوضوء

الوضوء مرتبط بالصلاه عندنا وكتير بنتكلم عن الصلاه وفضلها وحكمها وحكم تاركها

وان شاء الله لسه هانتكلم هنا عنها كتير

لكن النهارده انا حبيت اعرفكم اد ايه الوضوء ده مهم وجميل ورحمة من ربنا

الوضوء الى هو فرض ما بياخدش دقيقتين

واد ايه له فضل فعلا عظيم

تعالوا كده نشوف الرسول عليه الصلاة والسلام قال عنه ايه:

إذا توضأ العبد المسلم ( أو المؤمن ) فغسل وجهه ، خرج من وجهه كل خطيئة نظر إليها بعينيه مع الماء ( أو مع آخر قطر الماء ) فإذا غسل يديه خرج من يديه كل خطيئة كان بطشتها يداه مع الماء ( أو مع آخر قطر الماء ) فإذا غسل رجليه خرجت كل خطيئة مشتها رجلاه مع الماء ( أو مع آخر قطر الماء ) حتى يخرج نقيا من الذنوب .

الراوي: أبو هريرة المحدث: مسلم - المصدر: المسند الصحيح - الصفحة أو الرقم: 244

خلاصة الدرجة: صحيح

سبحان الله الحديث ده بيقول ان الوضوء مش بس طهاره ونضافه للبدن وانما كمان نظافه من الذنوب اعتقد الواحد لو حس كده وهو بيتوضى انه بيغسل نفسه من الذنوب عمره ما هايكروت الوضوء

نشوف الحديث ده كمان اد ايه جميل

رقيت مع أبي هريرة على ظهر المسجد فتوضأ ، فقال : إني سمعت النبي صلى الله عليه وسلم يقول : إن أمتي يدعون يوم القيامة غرا محجلين من آثار الوضوء ، فمن استطاع منكم أن يطيل غرته فليفعل .

الراوي: أبو هريرة المحدث: البخاري - المصدر: الجامع الصحيح - الصفحة أو الرقم: 136

خلاصة الدرجة: [صحيح]

غر :يعنى مقدمة راسهم بيضاء (غره مقدمة الراس)

محجلين : يعنى قدمهم واسفل ارجلهم بيضاء

بجد الحديث ده انا باحبه جدا له ذكرى معايا جميله بعدين نبقى نرغي فيها

لكن اد ايه المشهد ده الواحد لما بيتخيله بيكون جميل ورائع جدا

حديث كمان

قال رسول الله صلى الله عليه وسلم :

ألا أدلكم على ما يمحو الله به الخطايا ويرفع به الدرجات ؟ " قالوا : بلى . يا رسول الله ! قال " إسباغ الوضوء على المكاره . وكثرة الخطا إلى المساجد . وانتظار الصلاة بعد الصلاة . فذلكم الرباط " .

الراوي: أبو هريرة المحدث: مسلم - المصدر: المسند الصحيح - الصفحة أو الرقم: 251

خلاصة الدرجة: صحيح

اسباغ الوضوء: معناه اكمال الوضوء واتقانه بوصول الماء لجميع اجزاء الوضوء وزياده شويه

على المكاره : بمعنى فى ظل المصاعب (زي المايه البارده مثلا والجو بارد )

فذلكم الرباط : بمعنى ان الى يلتزم بالحاجات الثلاثه دول الى ذكروا فى الحديث كده هو ده نعم جهاد النفس والمداومه على الطاعه .

مفهوم الحديث كده ؟؟

لفت نظري مره وانا كنت بادعبس كالعاده فى موضوع على النت تعليمات وارده من جهه صحيه مختصه بالتنبيه انه فى حالة وجودك فى مكان يحتمل فيه العدوى يعنى اعداد كتيره مثلا او كده وفى حال الامور عاديه حتى

فيفضل انك كل ما يتيسر لك تغسل وشك وايدك ورجلك وراسك الى هى الاعضاء الى باينه منك وانت ماشي فى الشارع على الاقل خمس مرات تجنبا لحدوث عدوى بسبب التجمعات او الاماكن المغلقه

طبعا جهه مالهاش دعوه بالاسلام اساسا ولا كانوا بيجاملونا يعنى

فى الحقيقه مش متخيله الناس الى ما بيصلوش بيعيشوا ازاي من غير وضوء ؟؟!!!

سبحانه كل حاجه فرضت علينا والله لها حكمه

اتمنى اكون افدتكم

وربنا ينفعنا وينفعكم بثواب صالح الاعمال

جوريه بنت الحارث الخزاعيه ....زوجة رسول الله

أم المؤمنين جويريه بنت الحارث :

وهى جويريه بنت الحارث الخزاعيه المصطلقيه

وكانت بنت سيد قومه وسبيت فى غزوة بنى المصطلق وكانت فى نصيب ثابت بن قيس فكاتبها على نفسها يعنى انها تشترى نفسها

فذهبت للرسول عليه الصلاة والسلام

وتعالو نشوف عائشة هتقول ايه الى حصل: لما قسم رسول الله سبايا بنى المصطلق وقعت جوريه فى سهم ثابت بن قيس أو لابن عم له فكاتبته على نفسها

وكانت امرأه حلوه ملاح لا يراهااحد الا أخذت بنفسه

فاتت رسول الله صلى الله عليه وسلم تستعينه فى كتابتها

فتقول عائشه:فوالله ما هو الا ان رأيتها على باب حجرتى كرهتها وقلت يرى منها ما قد رأيت

فلما دخلت على رسول الله صلى الله علية وسلم: قالت يا رسول الله أنا جويريه بنت الحارث سيد قومه وقد اصابنى من البلاء ما لم يخف عليك وقد كاتبت نفسى فأعنى على كتابتى

قال : أو خير من ذلك أؤدى عنك كتابتك وأتزوجك؟"

فقالت نعم ففعل فبلغ الناس ان الرسول قد تزوجها فقالوا اصهار رسول الله فأرسلوا ما كان بأيديهم من بنى المصطلق فلقد اعتق الله تعالى مائة من أهل بيت بنى المصطلق ما أعلم امرأه أعظم منها على قومها بركه"

سبحان الله كان لكل زوج من زوجات النبى رضى الله عنهم سبب ومغزى يمكن احنا ما نخدش بالنا منه لكن طبعا زواج بأمر الله لا يكون عبثا ابدا فقد جعل الله زواج جويريه سبب فىعتق اهلها والله أعلم بما خفى علينا وعلى عقولنا الضئيله امام عظمة الله.
وكانت جويريه معروف عنها كثرة عبادتها وتسبيحهاوفى حديث حلو أوى عن كده :

عن جويريه رضى الله عنها "أتى رسول على رسول الله وأنا اسبح غدوة ثم انطلق لحاجته ثم رجع قريبا من نصف النهار وأنا اسبح فقال ما زلت قاعده؟ قلت نعم فقال : الا اعلمك كلمات لو عدلت بهن وزنتهن( يعنى لو زنت بهن يزنوا حميع ما سبحتى) وهو سبحان الله عدد خلقه ثلاث مرات وسبحان الله زنة عرشه ثلاث مرات وسبحان الله رضاء نفسه ثلاث مرات سبحان الله مداد كلماته ثلاث

مرات.

يلا بقى قول كده معنا ثلاث مرات عشان ربنا يكرمنا فى القاعده دى.
وقد توفيت جويريه فى سنة سته وخمسين هجريه فى عهد معاويه عن عمر سبعين سنه فى المدينه .
رحمها الله وأسكنها فسيح جناته.

سعيد بن جبير

السلام عليكم

النهارده يا جماعه هانتكلم على شخصيه مهمه جدا

وهى امام جليل وله مؤلفات ومجهودات رائعه وعظيمه ما نقدرش نوصفها

وهو سعيد بن جبير

سعيد بن جبير كان امام كبير جدا وكان فى عهد الحجاج بن يوسف الثقفي فى العراق

الحجاج كان حاكم ظالم وقاسي

وسعيد بن جبير كان بيتصدى له كثيرا

الى ان جاء يوم قرر الحجاج قتله

وارسل اليه جنوده يدقون بابه فى عنف ....

ففتح الباب، فلما رأى وجوههم قال: حسبنا الله ونعم الوكيل، ماذا تريدون؟

قالوا: الحجاج يريدك الآن.

قال: انتظروا قليلاً، فذهب، واغتسل، وتطيب، وتحنط، ولبس أكفانه

وقال: اللهم يا ذا الركن الذي لا يضام، والعزة التي لا ترام، اكفني شرّه.

فأخذه الحرس،

وفي الطريق كان يقول: لا حول ولا قوة إلا بالله، خسر المبطلون.

ودخل سعيد على الحجاج، وقد جلس مغضباً، يكاد الشرّ يخرج من عينيه.

قال سعيد: السلام على من اتبع الهدى – وهي تحية موسى لفرعون -.

قال الحجاج: ما اسمك؟

قال سعيد: اسمي سعيد بن جبير.

قال الحجاج: بل أنت شقي بن كسير.

قال سعيد: أمي أعلم إذ سمتني.

قال الحجاج: شقيت أنت وشقيت أمك.

قال سعيد: الغيب يعلمه الله.

قال الحجاج: ما رأيك في محمد صلى الله عليه وسلم؟

قال سعيد: نبي الهدى، وإمام الرحمة.

قال الحجاج: ما رأيك في علي؟

قال سعيد: ذهب إلى الله، إمام هدى.

قال الحجاج: ما رأيك فيّ؟

قال سعيد: ظالم، تلقى الله بدماء المسلمين.

قال الحجاج: علي بالذهب والفضة، فأتوا بكيسين من الذهب والفضة،

وأفرغوهما بين يدي سعيد بن جبير .

قال سعيد: ما هذا يا حجاج؟ إن كنت جمعته، لتتقي به من غضب الله، فنعمّا صنعت، وإن كنت جمعته من أموال الفقراء كبراً وعتوّاً، فوالذي نفسي بيده، الفزعة في يوم العرض الأكبر تذهل كل مرضعة عما أرضعت.

قال الحجاج: عليّ بالعود والجارية.

قال سعيد :لا إله إلا الله، ليالٍ حمراء، وموسيقى والهة، والأمة تتلظى على الأرصفة!!.

فطرقت الجارية على العود وأخذت تغني، فسالت دموع سعيد على لحيته وانتحب.

قال الحجاج: مالك، أطربت؟

قال سعيد: لا، ولكني رأيت هذه الجارية سخّرت في غير ما خلقت له، وعودٌ قطع وجعل في المعصية.

قال الحجاج: لماذا لا تضحك كما نضحك؟

قال سعيد: كلما تذكرت يوم يبعثر ما في القبور، ويحصّل ما في الصدور ذهب الضحك.

قال الحجاج: لماذا نضحك نحن إذن؟

قال سعيد: اختلفت القلوب وما استوت.

قال الحجاج: لأبدلنك من الدينار ناراً تلظى.

قال سعيد: لو كان ذلك إليك لعبدتك من دون الله.

قال: الحجاج: لأقتلنك قتلة ما قتلها أحدٌ من الناس، فاختر لنفسك.

قال سعيد: بل اختر لنفسك أنت أي قتلة تشاءها، فوالله لا تقتلني قتلة، إلا قتلك الله بمثلها يوم القيامة.

قال الحجاج: اقتلوه.

قال سعيد: وجهت وجهي للذي فطر السموات والأرض حنيفاً مسلماً وما أنا من المشركين.

قال الحجاج: وجّهوه إلى غير القبلة.

قال سعيد: فأينما تولوا فثمّ وجه الله [البقرة:115].

قال الحجاج: اطرحوا أرضاً.

قال سعيد وهو يتبسم: منها خلقناكم وفيها نعيدكم ومنها نخرجكم تارةً أخرى [طه:55].

قال الحجاج: أتضحك؟

قال سعيد: أضحك من حلم الله عليك، وجرأتك على الله!!.

قال الحجاج: اذبحوه.

قال سعيد: اللهم لا تسلط هذا المجرم على أحد بعدي.

بعد ما قتل الحجاج سعيد ابن جبير واراق دماؤه

ابتلاه الله بمرض عضال كان يأن من الالم ليلا نهارا ولم يغمض له جفن

وكان يقول: والله ما نمت ليلة إلا ورأيت كأني أسبح في أنهار من الدم، وأخذ يقول: مالي وسعيد، مالي وسعيد

الى ان مات هذا الظالم واستجاب الله لدعاء بن جبير ولم يسلطه على احد بعده ابدا

ندعوا الله ان لا يسلط علينا ظالم ابدا

رحمه الله سعيد بن جبير اماما جليلا قويا فى الحق شهيدا

وتحياتي لكم

تعدد الزوجات ... بين مؤيد ومعارض

تحديث مهم اوي يا جماعه

فى جزئيه فى البوست الى هى رواية ان عائشه وحفصه راحوا قالوا لواحده الرسول خطبها من كنده وقالولها لما يدخل عليكى قولي اعوذ بالله منك

فى الحقيقه انا قلتلكم اكتر من مره ان انا كنت كاتبه موضوعات زوجات الرسول من حوالي 8 سنين وكانوا اول ما بدأت وحيث انى كنت باكتب ساعتها لنفسي

مش بانشر كتابتي فى اي مكان فما كنتش باهتم اوي بذكر مصدر الكلام وعليه مش فاكره بصراحه اي كتاف يهم الى كنت اخدت منه القصه دي

ولكن الاخ احمد عمر قالي وثقيلي القصه

فى الحقيقه دورت لما عنيه اتمققت ولقيت ان الروايه صحيحه لكن الروايه الى وارد فيها قول زوجات الرسول دي سندها ضعيف

وعليه طبعا احقاقا للحق ا نا قلت لازم انبهمكم للموضوع ده

وحتى الاستاذ تامر علي انا جيت لقيته برضه دور وقالي هو كمان فى الردود

لكن احب اعقب بس بكلمتين عن الموضوع

زوجات الرسول دول كانوا بشر

اااااه كانوا فى مكانه خاصه الا انهم كانوا بيخطأوا برضه مش منزهين تماما

عائشه مره قالت لرسول الله : الا تزعم انك رسول الله ؟؟

وزنيب قالتله : أنا افقر يهوديتك ؟

وغيره وغيره مش ملايكه ولا مبعوثين حتى

ووارد ان احدى زوجات الرسول جابت عائشه وقالتلها احنا كان بينا ما كان بين الضرائر فسامحينى واسامحك قبل ما اموت

ايه بقى ؟؟؟

كانوا ضرائر وبيغيروا من بعض وبيكيدوا لبعض

اما بالنسبه لموضوعنا التعدد فانا هاشيل الواقعه دي

لكن ده لا يغير فى الامر من شيء

فاي موقف تاني يعبر عن غيره زوجات الرسول من بعضهم

يثبت وجهة نظري

تحياتي لكم

وصدقونى بافرح لما الاقي حد ورايا

******************************************************************

السلام عليكم

الاسبوع الى فات نزلت موضوع على المدونه الرئيسيه رغي امرأه غير مطحونه واتكلمت فيه بوجه معين عن التعدد

وقلتلكم بعيدا عن نقاش الناحيه الشرعيه

وقلتلكم انى باجهز موضوع للرؤيه عن التعدد فعلا

من فتره طلب مني الباحث عن الحقيقه ربنا يكرمه موضوع عن التعدد وقالي انى فيه لغط كتير فى المواضيع دي الايام دي .

وباقول لصديق الكلام ده قالي اه مش عارف مين عاملين قلق وعايزين يستصدروا قرار بمنع الجواز التاني وكلام من ده
المهم طبعا انا بقى ما كدبتش خبر قلت لا نسرع فى الامر من يومها وانا شغاله بحث فى هذا الموضوع على الصعيد الشرعي يعنى

نبدأ الكلام بقى

انا شايفه ان التعدد فى وجهتي نظر انا احب اناقشهم

الاولى بترفض التعدد وبتتهم الاسلام بالتخلف لاقرار ا لتعدد

وبتحاول تستصدر قوانين لمنعه

او استصدرتها بالفعل فى بعض الدول العربيه

اولا عشان نقدر نحط قاعده لكلامنا

اي حاجه نزل بها نص قرآني واضح وصريح مش من حق اي حد يخالفها

زي بالظبط الدستور اي قانون يصدر يكون مخالف للدستور بيدحض على طول

نفس الحكايه اي قانون وضعي يتعارض مع الشريعه خصوصا فى الاحوال الشخصيه يبقى ما ينفعش طبعا وقانونا غلط

فاكرين لما عمر بن الخطاب لقى ان المهور بتزيد والشباب تعبان مش لاقي جواز قام حدد المهور
فاكرين الست الشجاعه الى راحت قالتله الي راحت راجعته وقالتله مش من حقك تعمل كده ؟؟

وكان رده انه قالها اخطأ عمر واصابت امرأه

يعنى اساسا مش من حقكم تعملوا قانون يتعارض مع الشرع فى امور الزواج

اما بالنسبه لموضوع التعدد والى المجتمع الغربي والمتشبهين به شايفينه نقطه سوده فى القوانين الاسلاميه وعايزين يمسحوها باستيكه

ده لانهم قصاري النظر والعلم والمعرفه
التعدد مش بدعه ولا فكر وعاده استحدثها الاسلام

الاسلام قنن التعدد وعمل له حدود

اولا حدد عدد للتعدد

ثانيا اشترط العدل فى حال التعدد

يعنى عمل له تقييد لانه كان فى الاول العمليه سداح مداح على الاخر

واليهود عندهم تعدد على فكره وما يقدروش ينكروا ده

والنصاري على حسب ما قريت
إن الكنيسة ظلت حتى القرن السابع عشر تعترف بتعدد الزوجات

ويقال والله اعلم انهم ما عندهمش نص تحريمى للتعدد

المهم الى حصل وقت نزول حكم تحديد التعدد بحد اقصى اربعه
(أه بحد اقصى بس )

ده الى حصل فى اكتر من حاله

روى الإمام البخاري – رضي الله عنه – بإسناده أن غيلان الثقفي أسلم وتحته عشر نسوة ، فقال له النبي (صلى الله عليه وسلم) : ( اختر منهن أربعا )

والحكم ده كان للكل طبعا فيما عدا رسول الله صلى الله عليه وسلم

والى برضه نزله امر تحديد مختلف وهو ابقاؤه على نساؤه ولكن مافيش غيرهم خلاص يعنى لو ماتوا كلهم او طلقهم كلهم مالوش غيرهم خلاص

وطبعا بالنسبه لزوجات الرسول وظروف زيجاته منهم اظن انا اتكلمت عنها قبل كده وما زلنا بنكمل زوجه زوجه
المهم يعنى ان التهمه الملصقه الى انتم حاسينها نقطه سوده دي مش بتاعتنا اصلا

ده قانون البشريه من قديم الازل
بالعكس الاسلام حد منها وعملها قوانين وشروط

**********************************

نيجى بقى للفريق التاني الى على النقيض تماما من الاول

الفريق التاني مش بيثنى على فكره التعدد او بيقبلها بس لا

الا انه جنح بقى كمان لاعتباره سنه او فرض او فرض كفايه

ازاي

الفريق التاني ده بقى تسمع منهم كلام زي ده

الاصل فى الاسلام هو التعدد

اصل الآيه قالت : مثنى وثلاث ورباع
ما قالتش مفرد ؟؟؟!!!

طب نشوف الايه دي ومناسبة نزولها وتفسيرها ؟

وَإِنْ خِفْتُمْ أَلاَّ تُقْسِطُواْ فِي الْيَتَامَى فَانكِحُواْ مَا طَابَ لَكُم مِّنَ النِّسَاء مَثْنَى وَثُلاثَ وَرُبَاعَ فَإِنْ خِفْتُمْ أَلاَّ تَعْدِلُواْ فَوَاحِدَةً أَوْ مَا مَلَكَتْ أَيْمَانُكُمْ ذَلِكَ أَدْنَى أَلاَّ تَعُولُواْ (3)


سأل عروة بن الزبير السيدة عائشة -رضي الله عنها- عن سبب نزول هذه الآية فقالت: (يا بن أختي، هذه اليتيمة تكون في حِجْر وليها تشركه في ماله، ويعجبه مالها وجمالها، فيريد وليها أن يتزوجها بغير أن يقسط في صداقها، فيعطيها مثل ما يعطيها غيره، فنهوا عن أن ينكحوهن إلا أن يقسطوا لهن ويبلغوا لهن أعلى سنتهن في الصداق، فأمروا أن ينكحوا ما طاب لهم من النساء سواهن. [متفق عليه].

بتهيئلي معنى الايه مالوش دعوه خالص يا جماعه بموضوع اصل الجواز والكلام ده
ومافيش حاجه اسمها اصلا

الاصل فى الاسلام التعدد

يعنى ايه ؟؟
يعنى المفروض الواحد لما يجى يتجوز على يطول يبدأ باثنين ولا ايه ؟؟

غير ان الرسول عليه الصلاة والسلام ايام ما كان متزوج خديجه وحتى بعد نزول الرساله فضل متزوج من خديجه وحدها لحد ما توفاها الله

فى ناس بتقولك والله اصل التعدد ده سنه

طيب ازاي بس ؟؟
اذا كان الرسول عليه الصلاة والسلام كان له احكام خاصه اصلا فى موضوع الزواج وعدد الزوجات ده بالذات
وكمان ما ننساش حديث رسول الله

واظن تعدد الزوجات من عدمه ده من امورا لدنيا ولا ايه ؟؟
طيب ما الرسول عليه الصلاة والسلام كان مش بياكل حيوان الضب الى السعوديين بياكلوه؟
ولما سألوه احرام يا رسول الله ؟؟
فقال : لا والله ولكن تعافه نفسي

طيب يعنى الى ياكل الضب يبقى بيخالف السنه ولا ايه ؟؟

طبعا مش معنى ان كان في رخصه للرسول عليه الصلاة والسلام بخصوص عدد زوجاته

احنا بناخد السنه فى امور الدين من فضلكم
وما امر به الرسول نصا :

أنتم أعلم بأمر دنياكم
الراوي: عائشة و أنس بن مالك المحدث: الألباني - المصدر: صحيح الجامع -

حتى انه فى بعض النصوص ويعلم ذلك الدارسين والمتخصصين تكون صيغة الامر فيها مجرد توصيه مش ملزمه يعنى

وفي ناس بتقول التعدد بقى فرض كفايه ؟؟!!

لماذا يا سيدى الفاضل ؟؟

عشان انتشار العنوسه وعدد الرجال بقى اقل من عدد النساء ودى من علامت يوم القيامه ........................ الى اخره من الاسطوانه المحفوظه دي

طبعا انا بحثت فى الموضوع ده ولقيت ان حسب الاحصائيات الرسميه مافيش الكلام ده وما زال الذكور عددهم اكبر من الاناث (وده حسب الاحصائيات والرسميه فعلا مش احصائيات الجرايد واستفتاءات المجلات )

يعنى مش الحل اننا ننادي بالتعدد لان هايبقى لدينا مشكله اخرى هى عنوسه الرجال

انما الحل اننا ننادي الجنسين باعادة النظر فى الحياه وخصوصا ما يتعلق بالزواج وتجهيزاته والافكار المتعلقه بذلك
انا بس الى احب اعرفه فعلا

ليه الناس دول بيدوروا على تبريرات واهيه ؟
مع ان احنا مش محتاجين لها ابدا

ومش عيب ابدا انك تكون عايز تتجوز عشان مزاجك كده
او عشان هوى النفس
ما دام حلال

الشهوه مش حرام ده شيء فطري وجبلنا عليها والاسلام والشرع احترمها ونظمها واتكلم عنها فى القرآن والسنه
يبقى مالوش داعي ننزل فتاوي ما لهاش لازمه

عشان نزين الامر ونحوله من طلب امر من امور الدنيا الى سنه او فرض او ما الى ذلك

لكن طبعا مافيش مانع من اضمار النوايا الحسنه فى كل امر نقوم به حتى لو دنيوي

(زي ما كان الصحابه بيتزوجوا ارامل الشهداء مثلا )

بس كمان مؤكد ما كانوش هايروحوا يتجوزوا ارملة شهيد مش طايقنها يعنى

لكن ده جنب ده عادي

بس ما نطلعش فتاوي على مزاجنا بقى ؟!!؟!!

احنا ما عندناش فى الدين حاجه ابدا تقيد الزواج نفسه
ولا تقيد التعدد
ولا هو حرام ولا عيب التعدد
بالعكس ده نظام جميل جدا وقد يكون حلا لمشاكل معقده جدا
ومافيش اي داعي لانك تبرر

لـــــــــكـــــــــن
انا باخد على المجتمع بتاعنا 3 حاجات فى شان التعدد

اولا : العرف السائد على ان فى الغالب الزواج التاني بيكون فى السر وبدون علم الزوجه
وده مش شرعي طبعا

ثانيا : ان الى ترضى تكون زوجه تانيه المجتمع بيهاجمها وبيعتبرها مذنبه وخربت بيت
وحتى الزوجه الاولى لما بتوافق على ان زوجها يتجوز عليها ما بتسلمش من التريقه والكلام الجارح والتعاطف الجارح كأنها راضيه بوضع مشين مثلا ؟؟!!!

ثالثا : كمان انكار على الزوجه الاولى حقها فى رفض وضع التعدد ده . او انها تخير زوجها ان اردت الزواج بغيري طلقني

مع ان ده من حقها طبعا

وحصل ايام الرسول عليه الصلاة والسلام لما علي حب يتجوز

والرسول عليه الصلاة السلام قال : لا تجمع بين بنت حبيب الله وبنت عدو الله تحت سقف واحد
عارفه كل الاراء الى بتقول اااااااه ده عشان بنت حبيب الله وبنت عدو الله بس

لا طبعا

ده كلام مش صح كل واحد بقى له مبرراته وحر فيها

(واشمعن دلوقتي ده حكم خاص ببنت الرسول والرسول ومش سنه ؟؟؟)

احنا عايزين نعيش فى سلام مش فى حرب ضاريه

وطبيعى ان الزوجه تكون رافضه زواج جوزها من واحده تانيه

الرسول لما حب يخطب ام سلمه
قالتله : ما مثلي لينكح فلا ولد في(كبيره مش هاتخلف يعنى) وأنا غيور وذات عيال .

ولما عرف الرسول عليه الصلاة والسلام قالها: أما ما ذكرت أنك غيورة فسأدعوا الله عز وجل فيذهب غيرتك . واما العيال فالى الله ورسوله .

يعنى لا عنفها ولا قالها ايه تغيرى ده ولا انتى هاتنكري شرع الله ولا اي حاجه

لا بالعكس ترفق بها وقالها هادعي ربنا يذهب غيرتك

يعنى من حق الست تغير وترفض التعدد اهو ؟؟!!!

ارجوكم ما تهملوش حقوق حد
لا تنكروا تعدد الزوجات وتنكروا الحق ده للرجل وتعتبروه وضع اجتماعي مشين لكل الاطراف المشتركه فيه

ولا تنكروا كمان على الزوجات غيرتهم وطبيعتهم ولا حقهم فى انهم يرفضوا اي وضع يكرهوه

عارفه ان كلامي جايز ما يعجبش ناس كتير
لكن ارجوكم مش عايزه مزايدات على القرآن والسنه

ومش عايزه حد يجى يقولي الشيخ فلان قال مع احترامي لكل المشايخ

كل واحد حر في رايه ما دام ما خرجناش عن القرآن والسنه الصحيحه

وده رايي المتواضع جدا لك ان ترفضه او تقبله
بس فى النهايه احترم رايي زي ما باحترم رايك

ياريت احظى بنقاش جميل منكم

ميمونة بنت الحارث (زوجة الرسول عليه الصلاة والسلام )

ميمونة بنت الحارث رضى الله عنه:

وهى بنت الحارث الهلاليه وعن ابو هريره : ان ميمونه كان اسمها بره ولكن رسول الله سماها ميميونه.

اما امها فكانت هند بنت عوف الحميريه اى كانت(ميمونه يعنى) اخت زوجة الرسول السابقه زينب بنت خزيمه من الام وقد تزوج الرسول ميمونه بعد وفاة اختها زينب بنت خزيمه( ما حدش يقولي انه جمع بين الاختين ركزوا).

وكان يقال عن هند ام ميمونه انها كانت أكرم عجوز فى الارض اصهارا: فكانت ابنتها أسماء زوجة لجعفر ثم ابو بكر ثم على بن ابى طالب وكانت ابنتها سلمى زوجة لحمزه ولبابه الكبرى زوجة العباس بن عبد المطلب ولبابه الصغرى زوج الوليد بن المغيره وكان ابنها منه خالد بن الوليد

دول اخوات ميمونه رضى الله عنها المهم :

تزوج الرسول ميمونه حين نزل مكه معتمرا بعد ما فرغ من غزوة خيبر فوهبت ميمونه نفسها للرسول علية الصلاة والسلام

ونزلت فيها آيه" وامراة مؤمنة ان وهبت نفسها للنبي ان اراد النبي ان يستنكحها خالصة لك من دون المؤمنين"

ثم سارت معه للمدينه ودخلت الى بيت النبى ويقال انها اخر من دخل بها رسول الله

وعن ابن عباس رضى الله عنهما قال : قال رسول الله صلى الله عليه وسلم :الأخوات المؤمنات :ميمونه- زوج النبى رضىالله عنها-وأم الفضل. وسلمى-زوج حمزه-وأسماء بنت عميس اختهن لأمهن"

وقالت عائشه عنها بعد موتها وهى توعظ ابن اختها: ذهبت ميمونه ورمى بحبلك على الغارب الا انها كانت من أتقانا وأوصلنا للرحم"

وقد توفيت ميمونه رضى الله عنها سنة واحد وخمسين هجريه عن عمر ثمانون عام وقد دفنت بسرف حيث البلد التى بنا بها(دخل بها) رسول الله بها بناء على وصيتها

رحمهاالله زوج النبى صلى الله عليى وسلم

هم الجلساء لا يشقى بهم جليسهم

سلام عليكم يا اخواني الكرام

الحديث ده انا باحبه جدا وهو عن فضل ذكر الله تعالى فى المجالس وحبيتكم تقروه معايا عل لنا من اجره شيئا :

بداية كده خليكوا جدعان واذكروا الله جميعا

لا اله الا اله ولا حول ولا قوة الا بالله

بلسانكم بقى مش بعينكم بس ناخد الثواب كامل

يلا نقرا الحديث

حدثنا قتيبة بن سعيد: حدثنا جرير، عن الأعمش، عن أبي صالح، عن أبي هريرة قال :

قال رسول الله

: { إن لله ملائكة يطوفون في الطرق يلتمسون(يبحثوا عنهم ) أهل الذكر،

فإذا وجدوا قوما يذكرون الله تنادوا : هلمُّوا إلى حاجتكم.

قال : فيحفونهم بأجنحتهم إلى السماء الدنيا،

قال : فيسألهم ربهم، وهو أعلم منهم(والسؤال هنا بلغة التشويق لتعليم الملائكه ان من بنى ادم من يباه به الله الملائكه رغم انهم آدمين لهم حاجاتهم وليسوا مثل الملائكه ) ، ما يقول عبادي ؟

تقول(الملائكه يعنى) : يسبحونك ويكبرونك ويحمدونك ويمجدونك ،

فيقول (رب العالمين) : هل رأوني ؟

فيقولون : لا والله ما رأوك ،

فيقول : وكيف لو رأوني ؟

يقولون : لو رأوك كانوا أشد لك عبادة ، وأشد لك تمجيداً وأكثر لك تسبيحاً ،

يقول : فما يسألونني ؟

يقولون: يسألونك الجنة ،

يقول : وهل رأوها ؟

يقولون : لا والله يا رب ما رأوها ،

يقول : فكيف لو أنهم رأوها ؟

يقولون : لو أنهم رأوها كانوا أشد عليها حرصاً ، وأشد لها طلباً ، وأعظم فيها رغبة ،

قال :فمم يتعوذون ؟

يقولون : من النار ،

يقول : وهل رأوها ؟

يقولون : لا والله يا رب ما رأوها ،

يقول : فكيف لو رأوها ؟

يقولون : لو رأوها كانوا أشد منها فراراً، وأشد لها مخافة،

فيقول : فأشهدكم أني قد غفرت لهم.

يقول ملك من الملائكة : فيهم فلان ليس منهم ، إنما جاء لحاجة .

قال : هم الجلساء لا يشقى بهم جليسهم }

أخرجه مسلم في الذكر والدعاء والتوبة، باب: فضل مجالس الذكر .

الحمد لله تعال الذي اتانا من فضله

واذكروا لله تانى بقى

لا اله الا الله ولاحول ولا قوة الا بالله

صور من حياة الفاروق (الجزء التاني)

من فتره كنا اتكلمنا عن عمر بن الخطاب وقلنا كذا موقف من حياته فى بوست صور من حياة الفاروق (الجزء الاول )

والنهارده هانكمل ونشوف الجزء التاني ان شاء الله



كان عمر فى جولة من جولاته المعتاده فى الليل ليطمئن على رعيته

وهو ماشى فى أول المدينه سمع صوت أنين امرأه ينبعث من كوخ صغير وعلى بابه رأى رجلا يجلس فسأله عما يحدث فعلم منه ان زوجته هى التى تئن حيث اتاها المخاض وهى غريبه عن المدينه وليس معاه احد يعينها على ذلك

فرجع عمر بيته بسرعه لزوجته أم كلثوم بنت على بن ابى طالب وفاطمه بنت الرسول عليه الصلاة والسلام

فقال لها: هل لك فى مثوبة ساقها الله اليك؟؟؟

فقالت : خيرا ؟؟

فقال لها :امرأه غريبه تمخض وليس معها احد .

قالت: نعم ان شئت

وقام عمر جهز زاد وكل ما تحتاج اليه الوالده دقيق وسمن ومزق ثياب ليلف بها الوليد

وحمل عمر أمير المؤمنين القدر الى هيطبخ فيه الدقيق والسمن وقال لزوجته اتبعينى

(كانوا بيعملوا اكل للوالده كده بدقيق وسمن على ما أعتقد بيسموه ثريد والله أعلم )

وراحوا فعلا لكوخ ودخلت أم كلثوم للسيده تعاونها على أمرها اما بقى عمر عمل ايه امير المؤمنين جلس خارج الكوخ وأوقد النار وجلس يعد الطعام للمرأه التى فى مخاضها تخيلوا؟؟؟؟؟

والزوج طبعا قاعد ينظر اليه ومستغرب من كرم أخلاقه

وظهر صوت أم كلثوم عاليا : يا أمير المؤمنين بشر صاحبك بغلام.....

طبعا الرجل الى واقف جاتله صدمه نفسيه لما عرف انه واقف امام أمير المؤمنين ووسط ذهول الرجل حمل عمر القدر واقترب من بابا الكوخ ونده على زوجته

وقال: خذى القدر يا أم كلثوم وأطعمى الأم وأشبعيها .

وتطعمها أم كلثوم وترد القدر الى عمر فيقدمه للرجل

ويقول له : كل وااشبع فانك قد سهرت طويلا وعانيت كثيرا

ثم ينصرف هو وزوجته بعد ان يقول للرجل:اذا كان صباح الغد فائتنى بالمدينه لآمر لك من بيت المال بما يصلحك ولنفرض للوليد حقه.

وانصرف عمر وزوجته وسط ذهول الرجل لما حدث

****************************************************************


ويحكى على بن ابى طال انه رأى عمر يجرى وراء بعير فسأله الى اين يا امير المؤمنين .

فقال عمر:بعير ند من ابل الصدقه اطلبه.

يقول على : لقد اتعبت الذين سيجيئون بعدك .

فيجيبه عمر : والذى بعث محمد بالحق لو أن عنزا ذهبت بشاطيء الفرات لأخذ بها عمر يوم القيامه.

(عنزه مش بنى ادمين ماشيين يتعكبلوا على بعض ليلا نهارا )


****************************************************************

أمير المؤمنين وخليفة المسلمين فاروق الأمة عمر بن الخطاب رضي الله عنه يتفقد أحوال المسلمين والرعية في حمص ..
وفي جمع غفير يسأل أهل حمص :ما تقولون في سعيد بن عامر؟؟...

وبدأو الناس يقولوا شكواهم

(خلوا بالكم سعيد بن عامر لما سيدنا عمر عرض عليه إمارة حمص رفض )

وقال : (( لا تَفتني يا أمير المؤمنين ))..

ليجيبه عمر : (( والله لا أدعك ... أتضعون أمانتكم وخلافتكم في عنقي ... ثم تتركونني))...؟؟

طلب أمير المؤمنين من أهل حمص أن يعدّدوا شكواهم في سعيد بن عامر ..
تعالوا نشوف بقى الشكاوي الفظيعه فى حق سعيد بن عامر :

يقول احدهم :(( لا يخرج إلينا حتى يتعالى النهار ...... ولا يجيب أحدا بليل ... وله في الشهر يومان لا يخرج فيهما إلينا ولا نراه , وأخرى لا حيلة له فيها ولكنها تضايقنا , وهي أن تأخذه الغشية – أي الإغماء – بين الحين والحين ))..

قلق عمر واستغرب

ودعا الله :(( اللهم إني أعرفه من خير عبادك ... اللهم لا تخيّب فيه فراستي ))...

(ده على اساس ان الراجل يعنى عامل حاجه شنيعه )

وأحضر بسعيد ليدافع عن نفسه أمام عمر أمير المؤمنين

فقال :أما قولهم : (( إني لا أخرج إليهم حتى يتعالى النهار .. فوالله لقد كنت أكره ذكر السبب .. إنه ليس لأهلي خادم , فأنا أعجن العجين , ثم أدعه حتى يختمر , ثم أخبز خبزي , ثم أتوضأ للضحى ثم أخرج إليهم ))...

وأما قولهم : (( لا أجيب أحدا بليل ... فوالله لقد كنت أكره أن أذكر السبب ... إني جعلت النهار لهم , والليل لربي )) ..

وأما قولهم : (( إني لي يومين في الشهر لا أخرج فيهما .. فليس لي خادم يغسل ثوبي , وليس لي ثياب أبدلها , فأنا أغسل ثوبي ثم أنتظر حتى يجفّ بعد حين .. وفي آخر النهار أخرج إليهم ))..

وأما قولهم : (( إن الغشية تأخذني بين الحين والحين .. فقد شهدت مصرع خبيب الأنصاري بمكة , وقد بضَعت قريش لحمه , وحملوه على جزعة , وهم يقولون أتحب محمدا مكانك وأنت سليم معافى ..؟؟
فيجيبهم قائلا :والله ما أحبّ أني في أهلي وولدي , معي عافية الدنيا ونعيمها , ويصاب رسول الله بشوكة ..
فكلما ذكرت ذلك المشهد الذي رأيته , وأنا يومئذ من المشركين , ثم تذكرت تركي نصرة خبيب يومها , ارتجف خوفا من عذاب الله , ويغشاني الذي يغشاني ))...

(شوف العالم المفتريه على الخلق بقى ؟؟؟؟)

وإذ بأمير المؤمنين يستبشر ويضيء وجهه وهو يرى سعيد ودموعه من خشية الله وتقواه
....ويعلم عمر أنه أحسن حين اختار سعيد واليا على حمص فيقبل جبهة سعيد بن عامر الكريمه
ويقول :(( الحمد لله الذي لم يخيّب فراستي ))...

ونتكتفي بهذا القدر عشان ما تزهقوش مني مع ان مواقف عمر الفاروق لا تنتهي ولا بنبشع منها ومن جمال شخصه وعقله وقلبه