جوريه بنت الحارث الخزاعيه ....زوجة رسول الله

أم المؤمنين جويريه بنت الحارث :

وهى جويريه بنت الحارث الخزاعيه المصطلقيه

وكانت بنت سيد قومه وسبيت فى غزوة بنى المصطلق وكانت فى نصيب ثابت بن قيس فكاتبها على نفسها يعنى انها تشترى نفسها

فذهبت للرسول عليه الصلاة والسلام

وتعالو نشوف عائشة هتقول ايه الى حصل: لما قسم رسول الله سبايا بنى المصطلق وقعت جوريه فى سهم ثابت بن قيس أو لابن عم له فكاتبته على نفسها

وكانت امرأه حلوه ملاح لا يراهااحد الا أخذت بنفسه

فاتت رسول الله صلى الله عليه وسلم تستعينه فى كتابتها

فتقول عائشه:فوالله ما هو الا ان رأيتها على باب حجرتى كرهتها وقلت يرى منها ما قد رأيت

فلما دخلت على رسول الله صلى الله علية وسلم: قالت يا رسول الله أنا جويريه بنت الحارث سيد قومه وقد اصابنى من البلاء ما لم يخف عليك وقد كاتبت نفسى فأعنى على كتابتى

قال : أو خير من ذلك أؤدى عنك كتابتك وأتزوجك؟"

فقالت نعم ففعل فبلغ الناس ان الرسول قد تزوجها فقالوا اصهار رسول الله فأرسلوا ما كان بأيديهم من بنى المصطلق فلقد اعتق الله تعالى مائة من أهل بيت بنى المصطلق ما أعلم امرأه أعظم منها على قومها بركه"

سبحان الله كان لكل زوج من زوجات النبى رضى الله عنهم سبب ومغزى يمكن احنا ما نخدش بالنا منه لكن طبعا زواج بأمر الله لا يكون عبثا ابدا فقد جعل الله زواج جويريه سبب فىعتق اهلها والله أعلم بما خفى علينا وعلى عقولنا الضئيله امام عظمة الله.
وكانت جويريه معروف عنها كثرة عبادتها وتسبيحهاوفى حديث حلو أوى عن كده :

عن جويريه رضى الله عنها "أتى رسول على رسول الله وأنا اسبح غدوة ثم انطلق لحاجته ثم رجع قريبا من نصف النهار وأنا اسبح فقال ما زلت قاعده؟ قلت نعم فقال : الا اعلمك كلمات لو عدلت بهن وزنتهن( يعنى لو زنت بهن يزنوا حميع ما سبحتى) وهو سبحان الله عدد خلقه ثلاث مرات وسبحان الله زنة عرشه ثلاث مرات وسبحان الله رضاء نفسه ثلاث مرات سبحان الله مداد كلماته ثلاث

مرات.

يلا بقى قول كده معنا ثلاث مرات عشان ربنا يكرمنا فى القاعده دى.
وقد توفيت جويريه فى سنة سته وخمسين هجريه فى عهد معاويه عن عمر سبعين سنه فى المدينه .
رحمها الله وأسكنها فسيح جناته.

ميمونة بنت الحارث (زوجة الرسول عليه الصلاة والسلام )

ميمونة بنت الحارث رضى الله عنه:

وهى بنت الحارث الهلاليه وعن ابو هريره : ان ميمونه كان اسمها بره ولكن رسول الله سماها ميميونه.

اما امها فكانت هند بنت عوف الحميريه اى كانت(ميمونه يعنى) اخت زوجة الرسول السابقه زينب بنت خزيمه من الام وقد تزوج الرسول ميمونه بعد وفاة اختها زينب بنت خزيمه( ما حدش يقولي انه جمع بين الاختين ركزوا).

وكان يقال عن هند ام ميمونه انها كانت أكرم عجوز فى الارض اصهارا: فكانت ابنتها أسماء زوجة لجعفر ثم ابو بكر ثم على بن ابى طالب وكانت ابنتها سلمى زوجة لحمزه ولبابه الكبرى زوجة العباس بن عبد المطلب ولبابه الصغرى زوج الوليد بن المغيره وكان ابنها منه خالد بن الوليد

دول اخوات ميمونه رضى الله عنها المهم :

تزوج الرسول ميمونه حين نزل مكه معتمرا بعد ما فرغ من غزوة خيبر فوهبت ميمونه نفسها للرسول علية الصلاة والسلام

ونزلت فيها آيه" وامراة مؤمنة ان وهبت نفسها للنبي ان اراد النبي ان يستنكحها خالصة لك من دون المؤمنين"

ثم سارت معه للمدينه ودخلت الى بيت النبى ويقال انها اخر من دخل بها رسول الله

وعن ابن عباس رضى الله عنهما قال : قال رسول الله صلى الله عليه وسلم :الأخوات المؤمنات :ميمونه- زوج النبى رضىالله عنها-وأم الفضل. وسلمى-زوج حمزه-وأسماء بنت عميس اختهن لأمهن"

وقالت عائشه عنها بعد موتها وهى توعظ ابن اختها: ذهبت ميمونه ورمى بحبلك على الغارب الا انها كانت من أتقانا وأوصلنا للرحم"

وقد توفيت ميمونه رضى الله عنها سنة واحد وخمسين هجريه عن عمر ثمانون عام وقد دفنت بسرف حيث البلد التى بنا بها(دخل بها) رسول الله بها بناء على وصيتها

رحمهاالله زوج النبى صلى الله عليى وسلم

رمله بنت ابي سفيان (ام حبيبه )

رملة بنت ابي سفيان

وهي ام حبيبه

وهى اقرب زوجات الرسول نسبا اليه فقد كانت ابنة عم الرسول عليه الصلاة والسلام وابوها ابو سفيان بن حرب سيد بنى اميه وكبير آل عبد شمس فكانت ذات حسب .

وكانت رمله متزوجه من عبيد الله بن جحش وكان من بعض الرجال الذين لم يكونا يؤمنون بالاصنام ويدعون لعبادة الواحد رب ابراهيم

وتزوجته رمله واسلمت هى وزوجها سافروا الى الحبشه فى الهجره الاولى للمسلمين حيث اشار الرسول على المسلمين الذين اشتد بهم اذاء قريش ىانا يهاجروا الى الحبشه لان بها ملك عادل لا يظلم عنده احد وهى ارض صدق.

وفعلا رحلوا المسلمين وبينهم رمله وزوجها وانجبت رمله من زوجها حبيبه

وهناك تعبت رمله جدا من الغربه وتعب العمل وما زاد من المها هو ارتداد زوجها عبيد الله عن الاسلام واعلانه لنصرانيتة وقد دعاها لذلك وكلنها تمسكت بدينها ورفضت وافترقت عنه ومات هو بعد ذلك وهو على نصرانيته

وظلت ام حبيبه فى الحبشه الى ان جاء اليهم حبر بان السلمين قد اعتز موقفهم وثبت وان الرسول هاجر الى المدينه مع المسلمين وان الانصار بايعوه ان الاسلام قد قوى بعون ربهم فهدت نفوسهم

 ثم جاء يوم وطرقت فيه جاريه النجاشى ملك الحبشه باب رمله واعلمتها ان رسول
 الله طلبها للزواج ففرحت زمله كثرا وخلعت من يدها سوارين من فضه واهدتهما للجاريه للبشاره وتحقق بذلك رؤيا رمله من ذى قبل فقد رأت فى منامها وكأن هناك
 من يناديها بأم المؤمنين
 .

وزوجها النجاشى من رسول الله وقد كان وكيلها خالد بن سعيد بن العاص ودفع مهرها النجاشى وجهزت جوارى النجاشى رمله للرحيل محملة بهديا نساء النجاشى ورجعت الى المدينه ومعاها باقى المسلمين بعدما امنوا ايذاء قريش.

ودخلت رمله بيت الرسول وكان ذلك هبة من الله لهابعد ما عانته فى الهجره وفى حياتها وقد فرح الرسول بعودة المهاجرين الى اوطانهم فقد عانق ابن عمه المهاجر الى الحبشه وقال : ما ادرى ؟ بايهما اسر بفتح خيبر أم بقدوم جعفر.

 وكان صلى الله عليه وسلم عائد وقتها بجيشه منتصرا على يهود خير . وقد دخلت أم حبيبه بيت الرسول فى نفس الوقت مع صفيه ولكن مع اختلاف كبير فى موقف باقى زوجات الرسول فقد رحبوا برمله ندا لهم ولكنهم انفوا ان يقبلوا صفيه ندا لهم لاصلها اليهودى .

وبعد رجوعها المدينه علم ابوها بذلك وكان من اشد اعداء الرسول لكنه كان يعلم مكانة الرسول ايضا ويحترمه رجلا وفرح بنسبه وقال انه مثل محمد لا يرد له نسب
(رغم عداوتهم للاسلام وقتها الا انه كان عارف ان محمد حد محترم وعالي المقام بصرف النظر عن كونه نبي )
 وذهب ابى سفيا لبنته ليراها بعد سنين من الغيبه رغم انه قد امتنع عن ذلك من قبل لما بينه وبني المسلمين من عداوه ولكنه ذهب اليها ليوسطها لدى رسو ل الله ليعفوا عنهم ويطيل مده المهادنه التى اتفقم عليها فى صلح الحديبيه والذى ينص على عدم تعرض اى منهم للأخر ولكنهم نقضوا العهد بعد اعتدائهم على قبيلة خزاعه حليفة المسلمين .

المهم راح فعلا لبنته ولكنه لم يجد منها ترحيب ودخل عليها حجرتها فوجد فى جانب الحجره فراش فهم ان يجلس عليه
ولكنها اسرعت فطوت الفراش فزعل ابوها وسألها ليه

 فقالت :هو فراش رسول الله وانت رجل مشرك فلم احب انت تجلس عليه.

فطبعا غضب جدا ابوها وانصرف ولكنها ظلت واجمة باكيه تدعوا الله ان يهدى اباها الى دين الحق وقد حقق الله لها منيتها فقد اسلم اباها بعد فتح مكه وفرحت بذلك فرحا شديدا . دعت لابوها عشان ربنا يهديه وكلمته بالحسنى وهو كافر مش ................... ما علينا.

وحصل حاجه ظريفه من رمله وهى على فراش الموت فقد استرضت عائشه وأم سلمه وكانوا الاثنين عاملين نفسهم قائدتين لزوجات الرسول ولكل واحده فيهم حزبها

 فقالت لعائشه:قد كان بيننا ما يكون بين الضرائر افتحلليننى . فحللتها عائشه واستغفرت لها فسرت بذلك ام حبيبه وعملت نفس الموضوع مع ام سلمه

ورحلت عن الحياه فى سنة اربعه واربيعن هجريه ودفنت فى البقيع .

صفيه بت حيي بن الاخطب

السيدة صفيه بنت حيي:

كانت السيدة صفيه ذات نسب فقد كانت بنت حيي ابن اخطب سيد بنى النضير من اليهود وينتهى نسبها الى نبى الله هارون0

وقد تزوجت قبل اسلامها مرتين وقتل زوجها الثانى كنانه فى موقعه خيبر وكانت من اسرى المعركه ولما قسمت السبايا(الاسرى) سارت فى نصيب دحيه الكلبى فقيل للنبى صلى الله عليه وسلم عنها انها ذات نسب واصل وجمال وكان اجدى ان تكون له طبعا اعلاء لشأن الرسول وكمان عشان كمان هى زى ما بنقول بنت عز ما تتبهدلش يعنى المهم خدها الرسول فعلا وعوض دحيه الكلبى عنها بمال او اشتراها يعنى 0

طبعا احب انوه هنا ان فى ناس كده مخها على ادها بتقول ان الرسول عليه الصلاة والسلام شافها عند دحيه الكلبي وطمع فيها وخادها لنفسه .

طبعا الحكايه عمرها ما كانت سداح مداح كده . اولا كان المفروض الجواري حتى لما واحد يشتري جاريه او ياخدها غنيمه فى حرب كانت لازم يسيبها فى بيته شهر او لحد ما تحيض قبل ما يمسها .

وهنا الرسول عليه الصلاة والسلام اشترى صفيه من دحيه الكلبي عن رضا منه مش غصب عنه ولا حاجه .

وأعتقها الرسول وتزوجها وخيرها بين الاسلام واليهوديه

فقالت: يا رسول الله لقد هويت الاسلام وصدقت بك قبل ان تدعونى الى ذلك

0فأعتقها رسول الله وكان عتقها هو مهرها.

وعلى فكره صفيه كانت حلمت حلم قبل ما كنانه جوزها يموت بشاره بالرسول عليه الصلاة والسلام سبحان الله

حلمت ايه بقى:رأيت فى المنام قمرا أقبل من ناحية المدينة حتى وقع فى حجرى.

ولما حكت لزوجها كنانه غضب جدا وقال لها: ما هذا الا انك تتمنين ملك الحجاز :محمد.

وصفعها صفعه قويه على وجهها تركت اثر واضح بعد كده حتى ان الرسول سألها عن سببها وحكت له القصه.

وكان الرسول عليه الصلاة والسلام دايما يدافع عن صفيه مره دخل عليهاووجدها تبكى فسألها عن السبب فقالت: قالت لى حفصه انى بنت يهودى.

شوف بقى رد الرسول عليه الصلاة والسلام عليها

قال:انك لابنة نبي(يقصد هارون)وعمك نبي (موسى) وانك لتحت نبى(اى زوجة نبى) ففيما تفخر عليك ثم قال اتق الله يا حفصه.

شفت اد ايه شفقه الرسول وكياسته ولباقته وحسن تصرفه وذوقه

وفى قصة برضه حصلت مع صفيه تظهر اد ايه الرسول كان بيحاول دايما يبرز بيها انه ما يفرقش بين زوجاته ولا فضل لأعربى على اعجمى الا بالتقوى يعنى هى كانت يهوديه اه لكن اسلمت خلاص يبقى مش نعايرها كل شويه بانها كانت على غير ديننا حصل ايه بقى:

كانوا زوجات الرسول طالعين للحج مع الرسول عليه الصلاة والسلام وفى الطريق برك جمل صفيه بنت حيي وبكت وجاء الرسول حين أخبروه ومسح بيده دموعها وامر الناس فنزلوا فى المكان عسكروا فيه يعنى ولما جاء وقت الرحيل

قال الرسول لزينب وكانت أكثرهن ظهرا( جمال يعنى) : افقرى(أى اعيرى) ا ختك جملا . فقالت : انا أفقر يهوديتك؟

فغضب منها الرسول جدا وقاطعا طوال الحج ومن بعد الحج شهرين كمان ولم يذهب اليها ولا يقسم لها ابدا وبعد كده لما دخل عليها فضلت تسترضيه وأهدته جاريه عشان يصفح عنها واخيرا صفح عنها بعد مقاطعه كبيره رغم مكانة زينب من قلب الرسول زى ما عرفنا .

وفى قصه عجبتنى اوى اوى حصلت مع صفيه كان الرسول عليه الصلاة والسلام معتكف فى الغار وذهبت اليه صفيه لتكلمه وظلت ساعه ولما جت تخرج خرج معاها الرسول يوصلها لخارج الغار فكان فى اثنين من المسلمين مارين

فقال الرسول عليه الصلاة والسلام: على رسلكما انها صفيه بنت حيي.فقالا سبحان الله يا رسول الله فقال الرسول (ان الشيطان يجرى من ابن ادم مجرى الدم وانى خشيت ان يقذف فى قلوبكما شرا)

يا سلام القصه دى فيها معانى جميله اوى تعالى ناخدها واحده واحده

اولا ان صفيه كانت عند الرسول اثناء اعتكافه عادى يعنى مش عشان بيعبد ربنا يبقى نعض الى يجى نحيتنا زى ما بعضنا بيتخيل

ثانيا انه قام عليه الصلاة والسلام يوصلها لباب الغار مش قالها يلا فرقينا لا فى ذوق وأدب وترفق .

ثالثا بقى وده مهم أوى وهو ان الرسول عليه الصلاة والسام اتقى الشبهات يعنى فسر موقفه فورا للناس

مش قال بقى ده أنا الرسول بقى ماحدش ممكن يظن فى غلط وكمان وضح ليه هو قال كده مش عشان بقى هو مش واثق من نفسه ولا مثلا ظانن شر فى نية الى شافوه لا قال ان عارف ان الشيطان زى ما احنا بنقول شاطر وممكن يأثر على تفكيرهم وهو بكده سد باب فى وجه الشيطان

انما احنا بق ولله الحمد نلاقي واحده مثلا واقفه ساعه مثلا بتكلم واحد فى الجامعه وبعدين تقولك: ايه ده فلان ابن خلتى ولا ده جارنا ومتربيين مع بعض من واحنا فى كى جى وان

يا سلام طبعا ده مش مبرر ابدا انك تقفى تتكلمى معاه فى الشارع وبعد كده تقولى (انا طالما واثقه من نفسى ومش باعمل حاجه غلط ما يهمنيش الناس ) يا سلام وسد ابواب الشيطان ما جاتش على بالك

مش معنى كده انها لما تقابل حد تعرفه فى الشارع وجه يكلمها تخبطه بونيه لا طبعا لكن كمان ما نستهبلش .

وطبعا نفس الكلام باقوله للشباب مش البنات بس لكن الولد بقى رده بيبقى ساعات يفرس زى مثلا :

وأنا ما لى هى الى واقفه تتكلم هى حره وكأن الموضوع يخصها لواحدها انما هو ما يمسوش حاجه ليه مش عارفه

أو مثلا الرد التالى الى برضه يفرس ايه المشكله يعنى لما تقف معايا تكلمنى هو انا هاكلها ايه التخلف ده .

طب اسأله كده لو هو شاف اخته واقفه تكلم واحد ساعه ولا اكتر ولا اقل ساعتها هيبقى برضه ده موقفه طبعا لا اقل ما فى هيابادر بسؤال فى ريبه مين ده وليه وعشان ايه......... وده لو هو بارد يعنى.

ولما نقول كده يقولك مش كل الناس زى بعضها نفسى أعرف ازاى يعنى بس مش عارفه ولا فاهمه ايه مبادئهم.

احنا رغينا كتير وخرجنا عن الموضوع متأسفه .

المهم عاشت صفيه تقيه وارعه بعد وفاة النبى صلى الله عليه وسلم وماتت فى عهد معاويه سنة خمسين هجريه رضى الله عنها وأرضاها.

زينبت بنت جحش

وهى زوجة الرسول عليه الصلاة والسلام

و كانت بنت عمة الرسول عليه الصلاة والسلام

فأمها هى اميمه بنت عبد المطلب بن هاشم عمة الرسول عليه الصلاة والسلام وكانت ذات نسب وجمال .

وقد اسلمت صغيره وهاجرت الهجرتين وكانت مشهوره بلقب مفزع اليتامى والارامل لكثره تصدقها وعطفها عليهم .

ايه بقى كانت قصتها مع بيت النبوه

اولا نتعرف على زوجها الاول وهو زيد بن الحارثه وكان يطلق علي الحب لشدة حب الرسول علية الصلاة والسلام له وزيد كان ربيب الرسول يعنى الرسول كان كافله

قصته

كانت السيده خديجه فى زياره لابن أخوها ورجعت ومعاه زيد وهو صبى صغير رآه

الرسول فقال : والله انى لاجد فى وجهه عنصر الكرم وارى فى ملامحه مخايل الذكاء .

فاخبرته خديجه انه كان بن نعم(بن عز يعنى)

فسالها الرسو ل ان تهبه اياه فقالت هو لك يا ابن العم

ومن وقتها اعتقه الرسول وانزله منه منزلة الابن وارسل من يطمأن اهله عليه فقد كان الصبى يعلم نسبه ثم جاء اهله يفديانه ولكن الرسول طلب ان يخيروه فاختار زيد الرسول وتربى فى كنف رسول الله وكان معروف بزيد بن محمد حتى حرم التبنى

ونزلت الايه ( ادعوهم لابائهم هو اقسط عند الله......) ادعوهم: نادوهم أو اسموهم. اقسط : أعدل .

ضالمهم بعد كده زوجه الرسول من مولاته ام ايمن الحبشيه وانجب منها اسامه بن زيد وخطب له الرسول زينب ولكن زينب وأخواها رفضوا ذلك فى البدايه فقد كانت زينب من أشراف مكه اتتزوج من مولى من الموالى الى أن نزلت الايه ( ما كان لمؤمن ولا مؤمنه اذا قضى الله ورسوله أمرا ان يكون لهم الخيره من أمرهم. ومن يعص الله ورسوله فقد ضل ضلالا مبينا ) صدق الله العظيم

فلما علما زينب وأخوها بذلك رضوا بامر الله وتزوجته زينب وقد اراد بها الله ان تكون درسا للمسلمين الا يترفعن باصولهن على بعض وانما التقوى هى المقياس فلا فرق بين شريف ومولى من الموالى يعنى نوع من ازاله الفروق الطبقيه الى كانت موجوده

وفعلا تزوجت زينب بزيد ولكانهما كانوا دائمى المشاكل مع بعض وكان زيد يشكوا الى الرسول منها فيصبره وينصحه ويهون عليه من أمره .

الى ان نزل الوحى على الرسول بان زينب ستطلق من زيد وستكون زوجا له وطبعا لرسول لم يكن يستسيغ ابدا الفكره فكان زيد بمثابة ابنه ازاى يتزوج من مطلقته وده الى كان مش مقبول عند العرب

وكان محتار مش عارف رأى الناس هيكون ازى وخايف من ردة فعلهم

وحدث ان الرسول فى يوم راح يسال على زيد فى بيته لغيابه( ممكن نركز شويه فى الكلام الى جاى ده ماشى) ولم يكن ببيته فهرولت زينب للباب حين علمت

وقالت : ليس هو هاهنا يا رسول الله فادخل بابى انت وأمى يا رسول الله .

ولكن رفض الرسول الدخول ومضى وهو يتمتم( سبحان الله العظيم سبحان الله مصرف القلوب.

ولما رجع زيد وعرف الى حصل وقالت له زينب ما سمعت الرسول يتمتم به فكر شويه وودار فى باله ان الرسول سوف يأذن له فى فراق من زينب وذهب للرسول

وقاله :بلغنى انك جئت الى منزلى فهلا دخلت بأبى انت وأمى ..

وبعدين سأله : يا رسول الله افافارقها ؟

فسأله الرسول : ما لك؟أرابك منها شيء

قال زيد : لا والله يا رسول الله ما أرابنى منها شيء ولا رأيت الى خيرا؟

فقال له الرسول ناصحا: امسك عليك زوجك واتقى الله .

مع ان الرسول كان يعلم بان زينب ستطلق من زيد وتتزوج منه هو ولكنه كان يكتم الامر فى نفسه. وبعد فتره من الزمن لم يحتمل زيد العيش مع زينب وفارقها

وانتهت عدة زينب والرسول لا زال متخوف ومتردد فى التقدم لزينب زى ما قلنا.

لحد ما نزل عليه الوحى وهو جالس يتحدث الى عائشه فابتسم قائلا من يذهب الى زينب يبشرها بان الله زوجنيها؟

وتلى الرسول عليه الصلاة والسلام الايه( واذ تقول للذى أنعم الله عليه و أنعمت عليه : امسك عليك زوجك واتق الله وتخفى فى نفسك ما الله مبديه وتخشى الناس والله احق أن تخشاه . فلما قضى زيد منها وطرا زوجناكها لكيلا يكون على المؤمنين حرج فى ازواج أدعيائهم اذا قضوا منهن وطرا وكان أمرا مفعولا ) صدق الله العظيم.

ليه بقى قلنا نركز؟؟

لأن زواج الرسول من زينب بنت جحش اتقال فيه كلام كتيرأوى فى ناس بيقولوا كلام غريب أوى

هو ايه ان الرسول عليه الصلاة والسلام شاف زينب بنت جحش وهى على ذمة زيد بن حارثه وحبها وطلقها منه وتزوجها

طب بالذمه بعد الى احننا قلناه ده كلام يعقل تعالوا نوزنه ونشوف.

أولا ازاى يعنى شافها وحبها وهى على زمة زيد اذا كانت هى بنت عمته وطبعا كان يعرفها قبل الاسلام يعنى عارفها كويس وكمان بعد الاسلام ما اتفرضش الحجاب على النساء من الاول يعنى أكيد الرسول كان يعرف شكل زينب كويس لما راح زيد خصوصا انها كانت كمان زوجة زيد ربيبه يبقى ازاى يعنى لما راح ينادى زيد فوقع عينه على زينب فأرادها لنفسه وطلقها من زيد واتجوزها ازاى يعنى مش فاهمه ؟؟؟!!!!

كمان الاحاديث الى ذكرت دى كلها صحيحه ورقم اخراجها موجود لليحب

ازاى بقى بعد زيارة الرسول ووقوع حبها فى قلبه زى ما بيقولوا ااستغفر الله العظيم

سأله اذا كان يفارق زوجته فقاله ايه امسك عليك ز وجك واتقى الله .

ازاى بقى الكلام ده يدخل العقل. وغير ده كله آية القرآن واضحه جدا واظن دى بقى مافيهاش شك موضحه حكمة طلاق زيد لزينب وزواج الرسول منها بالنص( لكى لا يكون على المؤمنين حرج فى أزواج ادعيائهم) .

اظن كده ما فيهاش كلام الكلام الى بيتقال فى الموضوع ده كلام فارغ من غير ذى علم أو حد غرضه أصلا تشويه صورة الرسول لكن للأسف احنا بنردد الكلام دون علم أو دليل حتى ما بنحاولش نفكر فى الكلام قبل ما نقوله

نفسي الى يسمع كلام زي ده يدور بنفسه ويتحقق منه قبل ما يردده او حتى يقتنع به البحث مش صعب خصوصا فى عصرنا ده يمكن بحثي ورا الموضوع ده خلاني دورت فى زوجات الرسول كلهم ووجدت فيها مدرسه اجتماعيه وزوجيه عظيمه تستحق الدراسه .

المهم لما عرفت عائشه بزواج زينب طبعا غارت جدا لانها كانت عارفه انها جميله وكمان ذات نسب والى اكتر من كده ما نزل به القرآن فقد زوجها الله بأمره فقالت عائشه : تفخر علينا بهذا.

وزفت زينب للرسول وكانت تتفاخر على زوجات النبى بزواجها الذى جاء من السماء فضلا على جمالها ونسبها وكانت تقول: والله مأنا كأحد من نساء رسول الله زوجهن اهلهن وزوجنى الله من فوق سبع سموات وأنزل فى قرآن يقرأه المسلمون لا يبدل ولا

يغير.

طبعا ده اقل واجب الواحده لو جه اسمها ولا سيرتها فى مجلة ميكى هاتشيلها فوق راسها طول العمر ودي جه امر زواجها من الرسول فى القرآن لها حق يعنى تفخر

وعلم الجميع من نساء النبى مكانة زينب من نفس الرسول وخصوصا عائشه فكانت حاسه بقربها من قلب الرسول فكانت عائشه تقول :لم تكن واحده من نساء النبى تناصبنى غير زينب .

وطبعا كانوا بيغيروا منها وطبعا فاكرين حكاية العسل( أأكلت مغافير؟) الى اتفقت فيها عائشه مه حفصه و سوده بنت زمعه.

وكانت زينب مشهوره بكرمها وكثرة تصدقها بالمال فقد كانت تجيد دبغ الجلد والخرز وتبيع ما صنعت وتتصدق بثمنه على الفقراء والمساكين واليتامى.

وبعد وفاة النبى صلى الله عليه وسلم ظلت على صلاحها وبرها بالفقراء وفى أول خلافة عمر بن الخطاب ارسل اليها بعطاء خصص لزوجات النبى فأمرت خادمتها أن صبيه وغطته: وقالت غفر الله لعمر وأمرت خادمتها ان وزعته على المحتاجين ختى بقى القليل فقالت لها : يا أم المؤمين قد كان لنا فى هذا حقا

فقالت زينب : اللهم لا يدركنى عطاء لعمر بعد عامى هذا اللهم لا يدركنى هذا المال فى قابل فانه فتنه . ولما عرف عمر فارسل لها الف اخرى فوزعتها ايضا.

وكان الرسول يهزر مع زوجاته ويقول لهم اسرعكن لحاقا بى أطولكن يدا.

فكان لما يجتمع نساء النبى فى منزل احداهم بعد وفاة الرسول يمددن ايدهن الى الجدار يتطاولن ايتهن اطول يدا ولا زلن يفعلن هذا حتى ماتت زينب فعلا ان الرسول انا قصد بأطولهن يدا أكثرهن صدقه.

ووصفها الرسول ايضا لعمر بن الخطاب انها اواها (أي خاشعه متضرعه )

وحيت توفت زينب كانت اول من شيع جثمانها فى صندوق خشبي اقترحته اسماء بنت عميس على عمر بن الخطاب كما رأته فى الحبشه حتى يخرج المسلمين جميعا فى جنازتها ويسترها الصندوق

وتوفيت سنة عشرين عن عمر ثلاث وخمسون سنه(التواريخ فى الغالب بتكون تقريبيه)

ونفعنا الله واياكم بخير الثواب وشكرا عشان بتستحملوا مواضيعى الطويله

ام سلمه(هند بنت ابى اميه بن المغيره)

وهى قريشيه مخزوميه واشتهرت باسم ام سلمه بنت زاد الركب

طب ليه سموها كده زاد الركب دى شهره ابوها لانه كان مشهور جدا بالكرم وكان اذا سافر فى ركب مع مجموعه يعنى يكفيهم من الزاد طول السفر ولا يدع احد من الركب يحمل معه زاد فسموه زاد الركب

اما بقى ام سلمه فطبعا لانها اكيد عندها ولد اسمه سلمه انجبته من زوجها عبد الله بن اسد بن المغيره وهو ابن بره بنت عبد المطلب عمه الرسول

وكمان عبد الله كان اخا للرسول فى الرضاعه وكان من المسلمين الاوئل هو وزوجته هند وهاجرت مع زوجها للحبشه فى هجره المسلمين الاولى و انجبت هناك ابنها سلّمه

وبعدين رجعت تانى لمكه مع زوجها وبعدين استعدوا للهجره للمدينه مع باقى المسلمين لكن حصلهم قصه مؤلمه وصعبه جدا اايه بقى الى حصل:

جهزوا الركوبه وركبت ام سلمه وابنها وساق البعير ابو سلمه وبعدين شافوهم بنى المغيره اهل ام سلمه فراحوله وقالولوا انت حر فى نفسك عايز تهاجر روح انما زوجتك قريبتنا ومن حقنا نحميها منك ونمنعها من الهجره معك

وخدوا منه ام سلّمه فعلا فمين بقى الى اعترض بنو عبد الاسد اهل ابو سلمه وقالوا لا اذا اخذوها ناخذ ابننا وفضلوا يتخانقوا على سلمه لحد ما ايده كانت هتتخلع بينهم و خدوه فى الاخر بنى عبد الاسد

وهى كانت عند اهلها حبسوها فى مكه وفضلت تبكى ام سلمه الى جرالها من اهلها سنه كامله لحد ما اهلا رافوا بيها وقالوا لها الحقى بزوجك

وكان هو ذهب للمدينه وساعتها وافق بنى اسد انهم يعطوها ابنها وسافرت فعلا للمدينه وصاحابها فى الرحله عثمان بن طلحه لما لقاها مسافره لواحدها

وهى بعد كده قالت فيه: فا والله ما صاحبت رجلا من العرب قط ارى انه كان اكرم منه. هو على فكره لما لقاها مسافره سالها اذاكان معاها حد قالت الله وولدى هذا

فقال: والله ما لك من مترك.يعنى ما يصحش يسيبها لوحدها

وهى حكت ان كان كل ما يحب يقف فى الطريق ينخ الجمل ويبعد بعيد لحد ما تنزل بعدين يرجع يربط الجمل ويركن الى شجره بعيد عنها وبعدين يرجع لما يحب يمشوا يقدم الجمل ويبعد لحد ما تركب وبعدين ياخد اللجام ويمشى وهكذا وعلى فكره ده كان قبل ما يدخل فى الاسلام كمان شفتم اخلاق العرب عشان الناس الى بيقولوا همج وبدو والكلام التعبان ده
كان عندهم نخوه واخلاق ما عادتش عندنا للاسفه يمكن الاخ ما عادش يهمه اخته تروح ولا تيجى ولا تسافر ولا تجوع حتى .

المهم ام سلمه لما راحت المدينه ما كانوش مصدقينها انها بنت زاد الركب لان ده كان نسب عالى جدا فكانوا مكذبنها لحد ما جه موسم الحج فبعتت معاهم رساله لاهلها فصدقوها بقى وانجبت فى المدينه من ابو سلمه عمر ودره وزينب وبعدين ابو سلمه مات ودار بينه وبين ام سلمه حديث جميل ايه رايكم نشوف قالوا ايه :

قالت ام سلمه بلغنى انه ليس امرأه يموت زوجها وهو من اهل الجنه ثم لم تتزوج الا جمع الله بينهما فى الجنه فتعال اعاهدك الا اتزوج بعدك.

قال ابو سلمه:اتطيعينى؟

قالت: نعم

قال: اذا مت تزوجى اللهم ارزق ام سلمه بعدى رجلا خيرا منى لا يحزنها ولا يؤذيها .

ولما مات ابو سلمه احتسبت ام سلمه مصيبتها عند ربنا وقالت ان لله ان الهي راجعون اللهم انى احتسب مصيبتى في ابى سلمه عندك اللهم ابدلنى خيرا منه ثم قالت فى نفسها ومن خيرا من ابى سلمه.

وبعدين لما جه رسول الله وخطبها فقالت ايه بقى: انا مصبيه(يعنى عندها صبيه) وانا غيوره وانا كبيره السن فلم بلغ رسول الله ما قالت قال: اما كبر السن فانا اكبر واما الغيره ادعو الله ان يذهبها عنها واما العيال فالى الله ورسوله.

واتزوجت من الرسول عليه الصلاه والسلام فعلا وكانت لها منزله فى نفسه لم تنزلها اى واحد من زوجاته بعد عائشه فكانت منزلتها تقارب عائشه عشان كده كانت عائشه بتغير منها جدا وكانت ام سلمه شخصيتها قويه جدا ولها مواقف كتير تثبت كده هاحاول اقول اكترها زى ايه:

كان فى مره مشكله بين الرسول وزوجاته حول النفقه فى بيت النبى المهم الرسول يومها كان مضايق و ما خرجش يصلى بالمسلمين فدخل له ابو بكر وبعده عمر وعرفوا ان الموضوع متعلق بالنفقه فكل واحد فيهم حاول يخفف عن الرسول عليه الصلاه والسلام بالمزاح معاه

وبعدين ابو بكر عنف بنته على انها مزعله الرسول وزيه عمل عمر ابن الخطاب ابو مين?? حفصه اوعى تنسى

المهم وبعدين لسه يا دوب جاين يكلموا ام سلمه قالت لهم ايه بقى:ما لكما ولما هاهنا ! رسول الله اعلى بامرنا عينا ولو اراد ان ينهانا لنهانا فمن نسأل ان لم نسال رسول الله؟

ناس جامدين الصراحه

طبعا بعد الكلام ده خرجوا الاثنين من غير ولا كلمه وطبعا فرحوا اوى زوجات الرسول وشكروها على وقفتها دى.

كمان فاكر قصه حفصه لما عرف ابوها نها تراجع الرسول فيما يقول وراح يعاتبها على كده خرج من عنده وراح لام سلمه لانها كانت قريبته( وعلى فكره لحد الوقت الى بنتكلم فيه كان لسه الحجاب لم يفرض على النساء) وسالها على مراجعه زوجات النبى له فقالت له : عجبا يا بن الخطاب قد دخلت فى كل شىء حتى تبتغى ان تدخل نفسك بين رسول الله وازواجه.

طبعا دى كانت اخر مره يتكلم فى الموضوع ده.

اما بقى عن غيره ام سلمه على الرسول فحصل منها مواقف لذيذة اوى منها: كان الرسول خارج للسفر و واخد معاه ام سلمه وصفيه ( وعلى فكره كان بيختار الى تسافر معاه من زوجاته بالقرعه بينهم) المهم فراح الرسول وهو فى الطريق ناحيه هودج صفيه وكان فاكره لام سلمه وكلمها بعدين لما عرف انها صفيه مشى راح للهودج التانى لام سلمه هى بقى من غيرتها اندفعت على طول وقالتله: تتحدث مع ابنه اليهودى فى يومى يا رسول الله؟ بس بعد كده زعلت من نفسها واعتذرت لرسول الله واستغفرت ربنا.

كمان ام سلمه كانت مشهوره برجاحه العقل والذكاء فى الموضوع ده لنا برضه موقف جميل.

كان الرسول عليه الصلاه والسلام خرج واصحابه فى السنه السادسه الهجريه الى مكه قاصدين حج البيت ولكن قريش اعدت لهم العده وارسلت لهم الرسل لاستبيان الموقف وعرفوا منهم انهم ما جاؤا الا للحج فقط لكنهم رفضوا برضه

وبعدين عقد الرسول معهم هدنه ووقف القتال على ان يعودوا العام القادم لاداء الحج فى نفس الميعاد وكان ده صلح الحديبه وكان اكتر المسلمين مش راضين عليه واعتبروه مهانه لهم

لكن بعد مرور الوقت اكتشفوا ان كان خطوه عظيمه

المهم امر ارسول المسلمين انهم ينحروا هديهم ويحلقوا رؤسهم لانهم كانوا محرمين لكنهم تباطؤا فى ذلك الى ان غضب الرسول جدا وخشى على المسلمين من الفتنه والتفرق

ودخل لام سلمه وحكى لها ما كان من امر المسلمين فهدأت من نفسه ام سلمه وقالت لهيخرج ولا يكلم احد ويذبح هديه ويحلق ر اسه وعمل الرسول زى ما قالت له فعلا وبعدها اتكسف المسلمين بقى من نفسهم وعملوا زى ما الرسول عمل واتحلت المشكله

وعاشت ام سمله بعد وفاه الرسول كتير وكانت اخرهن موتا وماتت ويقال انها حضرت مذبحه كربلاء وبعدها ماتت نبقى نتكلم عن مذبحه كربلاء فى يوم تانى ان شاء الله وكانت من اكبر رواه الحديث

دفنت فى المدينه فى البقيع مع باقى زوجات النبى .

رحمها الله ورضى عنها وارضاها

.زينب بنت خزيمه

زينب بت خزيمه

كانت تلقب بأم المساكين لأنها كانت رحيمة بالمساكين جدا

وكانت متزوجه من عبيده بن الحارث بن المطلب من أولاد أعمام النبي

وبعد استشهاده تزوجها الرسول عليه الصلاة والسلام

لكنها ماتت بعد فتره قصيرة جدا تقريبا شهرين

وفى الشهرين كانت ضيفه خفيفة على زوجات الرسول

ولم تسبب لهن في أي أذى وفارقت بيت النبوة والحياه

وتركت فى نفوس الجميع الذكرى الطيبه.

حفصة بنت عمر بن الخطاب

ولدت حفصه قبل نزول الرسالة بحوالي خمس سنين وكان متزوجه قبل الرسول عليه الصلاة والسلام مرتين

ولما مات زوجها الثاني خنيس بن حذيفه السهمي وكانت ما زالت سنها صغير فراح أبوها عمر وعرضها على عثمان وكان وقتها زوجته رقيه بنت الرسول عليه الصلاة والسلام لسه متوفيه قريب

فرد عليه عثمان : ما أريد أن أتزوج اليوم .

فراح لابو بكر وعرضها عليه برضه فسكت و ماردش عليه

وغضب جدا عمر منهم وراح يشتكى لرسول الله صلى الله عليه وسلم من الى حصل منهم

فقال الرسول(يتزوج حفصه من هو خير من عثمان ويتزوج عثمان من هى خير من حفصه)

فطبعا فهم بسرعة قصد الرسول وفرح جدا لان الرسول هيتزوج من بنته وفعلا تم الزواج وكان وقتها في بيت الرسول سوده بنت زمعه وعائشة
بس حفصه كانت ذكيه فعقد العزم من أول يوم على أن تكون صديقه لعائشة أليفه لها ده لان أبوها وصاها بكده لأنه يعرف مدى حب الرسول لعائشة ويعرف أن إلى يرضى عائشة كأنه رضى الرسول عليه الصلاة والسلام

ورغم أن عائشة كانت طبعا لما علمت بزواج الرسول من حفصه كان بها غيره عظيمة لان حفصه كانت صغيره وجميلة ولأبوها مكانه في نفس رسول الله ليست هينة لكن بعد فتره اصبحوا حميمات لبعض جدا وكانوا متفقين خاصة لما البيت دخله نساء أخريات غيرهم وسوده كان موقفها من حفصه عادى جدا وكانت بتحبها

المهم حفصه كانت طيبه جدا وكانت بتسمع كلام عائشة وفى مره اتفقوا على رسول الله ومعاهم سوده بعد ما الرسول تزوج من زينب بنت جحش وكانوا بيغيروا منها

فكانوا كل ما يدخل عند واحدة منهم يسألوه :أكلت مغافير؟؟

فيرد الرسول :لا ولكن اخذ شربه عسل عند زينب.

فيقولوا :فقد رعت النحلة في حقل مغافير .

والمغافير دى ثمره كان ليها رائحة الرسول عليه الصلاة والسلام مش بيحبها فحرم الرسو ل عليه الصلاة والسلام العسل إلى عند زينب . أصلهم برضه كانوا ستات يعنى.

بس في واقعة حصلت من المؤامرات بتاعه عائشة وحفصه خلت الرسول عليه الصلاة والسلام غضب جدا من حفصه ويقال انه طلقها طلقه واحدة بسبب الموضوع ده

إيه بقى هو:حصل إن ماريه قصدت بيت الرسول عليه الصلاة والسلام وكان لها بيت لوحدها بعيد عن باقي الزوجات إلى كان بيوتهم بجوار المسجد

المهم راحت وكانت حفصه في زيارة أبوها ولما رجعت حفصه وجدت ستر مسكنها مسدلا(يعنى الستار إلى على الباب مقفول)وعلمت أن ماريه مع الرسول داخل مسكنها

فعصفت طبعا الغيرة بقلب حفصه وظلت جالسه تنتظر خروج النبي وكلما مر الوقت ازداد غضبها

أول ما خرجت ماريه لم تتمالك حفصه نفسها ودخلت على رسول الله تقول: ( لقد رأيت من كان عندك ، والله لقد سببتنى وما كنت لتصنعها لولا هواني عليك .

فلما شاف الرسول حاله حفصه استرضاها وترفق بها حتى انه اقسم لها أن ماريه حرام عليه إن هي نست إلي حصل ده واحتفظت به لنفسها ولم تخبر به أحد

طبعا حفصه ارتاحت جدا لان زوجات الرسول كلهم كانوا بيغيروا من ماريه القبطية لأنها الوحيدة إلى خلف منها الرسول بعد السيدة خديجه

وفضلت حفصه ماسكه نفسها مش عايزه تقول لعائشة لكن مفيش فايده قالت برضه لعائشة عشان تفرحها إن الرسول حرم ماريه عليه وطبعا عرفت ليييييه

بس بقى إذا كانت حفصه زعلت لاختلاء الرسول بماريه فى مخدعها فان ثوره عائشة كانت لأن ده كان في يومها.

و طبعا الخبر انتشر والرسول عرف طبعا وراح سال حفصه واعترفت إنها أفشت السر وزوجات الرسول كلهم ثاروا

وقلن في ذلك : صبرنا على إيثار الرسول لابنة أبى بكر وما بقى إلا تلك الامه القبطية فأي هوان .

ويقال أن الرسول طلق حفصه في هذه الوقعة ولكنه راجعها بأمر من جبريل

حيث قال ارجع حفصه فإنها صوامه قوامه وانها زوجتك في الجنة.

وطبعا رجعت حفصه وهى نادمه فعلا على ماحصل منها في حق رسول الله .
وكان من نصائح أبوها لما عرف من زوجته إن حفصه تراجع رسول الله في قوله(يعنى تناقشه وتعارضه ) فراح وسألها هل تفعل فقالت : والله لاراجعنه . يعنى تفعل ذلك،

مش بقى فرح وقالها أيوه كده خدي حقك زي ما بيعمل ابهات الأيام دى لا

قالها : تعلمين إني أحذرك عقوبة غضب الله وغضب رسول الله يا بنيه لا يغرنك هذه التي أعجبها حسنها وحب رسول الله لها(يقصد عائشة) والله لقد علمت إن رسول الله لا يحبك ولولا أنا لطلقك .

كمان في مره كان في مشكله بين الرسول وحفصه وسيدنا عمر أتدخل فيها فقال الرسول حدث كذا وكذا فذممته حفصه يعنى قالت له بذمتك؟

فطبعا سيدنا عمر غضب جدا جدا ما استحملش قام ضربها بالقلم وقالها انت بتكذبى رسول الله فزعل منه الرسول عليه الصلاة و السلام لأنه كان مش بيحب العنف ده .

وفى حاجه بقى ظريفة جدا من ضمن مؤامرات عائشة و حفصه

كان وصل لعلمهم أن الرسول عليه الصلاة والسلام سيتزوج من اسماء بنت نعمان الكندية من نجد وكان عرضها أبوها على النبي ووافق النبي

وفعلا بدأت تستعد للزواج في أحد بيوت بنى سعده ولما عرفوا زوجات الرسول وانتقلت لهم أخبار أنها جميلة وصغيره فذهبوا إليها وقالوا لها إذا أردت أن تكوني ذات حظوة عند النبي فإذا دخل عليك فقولي إني أعوذ بالله منك فان ذلك يسره ويعجبه

وعملت أسماء بنصيحة النساء وفعلا لما دخل الرسول عليها قالت أعوذ بالله منك فاستدار الرسول عنها وهو يقول عذت بمعاذ عذت بمعاذ .

يعنى انك لجأت لمن يلجا إليه

ثم أمر برد أسماء إلى أهلها ولما أهلها حكولوا إلى حصل ابتسم الرسول ولم يرجع في رأيه.
بس وكانت حفصه كثيرة الصوم والصلاة والقيام وحفظت القرآن وتعلمت القراءة والكتابة دون غيرها من زوجات النبي وكان عندها أول نسخه من القرآن وفضلت عندها لحد ما ماتت في المدينة وعمرها ستين سنه في عهد معاوية ابن سفيان ودفنت في البقيع.

رحم الله حفصه الصوامه القوامه زوج رسول الله فى الجنه وام المؤمنين رضي الله عنها وارضاها

واتمنى ما اكونش طولت عليكم وجزيتكم خيرا عنا بحسن المتابعه

حديث الافك

قلنا واحنا بنتكلم عن السيده عائشه رضى الله عنها اننا هاتنكلم بعدين عن حديث الافك .
نحكي الحكايه من الاول زي ما حكيتها عائشه رضى الله عنها لكن انا هانقلها بلساني انا تسهيلا للامر
بتحكي عائشه وبتقول : لما كان الرسول عليه الصلاة والسلام يجى يسافر كان ببيقترع بين زوجاته والى تطلع فى القُرعه هى الى بتسافر معاه . ووفى الرمه دي كان الرسول طالع غزوه من غزواته واقترع على الزوجات وكانت عائشه هى الى هتسافر معاه .
وسافرت فعلا وكان وقتها اتفرض الحجاب علي النساء وكانت تحمل فى هودج(حاجه زي الصندوق كده بتبقى على ظهر الجمل )وطبعا ده كان مخصص للنساء فى السفر .

المهم راحوا الغزوه ورجعوا وهما راجعين وكانوا معسكرين فى مكان ولما هموا بالرحيل منه عائشه راحت بعيد تقضي حاجتها ولما رجعت وهى طالعه الهودج انفرط العقد بتاعها فنزلت تلم حباته من على الارض وسرحت شكلها ورا الحبات بعيد شويه جم الناس شالوا الهودج بتاعها وكانت صغيره فى السن وخفيفه ما لاحظوش فرق كبير يعنى شالوا الهودج ورفعوه على الجمل ومشيوا ونسيوها .

فرجعت عائشه لقت مافيش حد فقالت انا هاقعد مكاني فهما لما يحسوا انى مش معاهم هايرجعوا . وغلبها النوم ونامت مكانها .

مر بها فى الوقت ده (صفوان بن المعطل السٌلَمِي) فرأى من بعيد حد نايم فى الظلام فاقترب حتى يتبين مين نايم كل ده وعائشه نايمه ما حستش به الا وهو بيرجع لما شافها وعرفها لانه طبعا كان عارف شكلها قبل ما يضرب الحجاب .

المهم هى حست به وهوما كلمهاش خالص لكن ابتعد واناخ لها الناقه وركبت ومشي بها لحد ما وصلها للجيش مكان ما نزلوا . ولما رجعوا المدينه قعدت عائشه مريضه وفى بيت ابوها ابو بكر رضى الله عنه شهر كامل .

والى حصل ان عبد الله بن أبي سلول اتهمها هى وصفوان بايتاء الفاحشه اعاذنا الله واياكم (لمجرد انه عرف انه هو الى رجعها للقافله ).
والكلام بدأ يتناقل ووصل للرسول عليه الصلاة والسلام ولكن عائشه كانت مريضه وما تعرفش اي حاجه عن الكلام ده غير انها تقول انها كانت تشعر بتغير معاملة الرسول لها ولا تجد منه اللين والحنان الي هى متعوده عليه وخصوصا فى مرضها . وكانت مستغربه .

وبعد شهر لما بدأت تشفى وخرجت مع أم مسطح لتقضي حاجتها (كان زمان مافيش حمام كانوا بيروحوا بعيد كده عن البلد يقضوا حاجتهم والستات كانوا بيروحوا بالليل صحبه كده يخلصوا ويرجعوا صحرا بقى ) المهم عائشه عرفت من ام مسطح الى اتقال عنها .

طبعا عائشه زهلت ورجعت البيت تبكى وازادت مرضا على مرضها وسألت امها وابوها عن صحة الكلام الى سمعته فأمها قالتلها : هون عليكى مافيش ست بتكون جميله ومفضله عند جوزها الا ويكيدوا لها الناس .

طبعا عائشه فضلت تبكى طول الليله دي . واستشار الرسول اصحابه فى امرها لو شاوفوا عليها حاجه . شهد لها اسامه بالخير وعلي قال بشكل مقنع للرسول والله ربنا موسع عليك والنساء غيرها كتير ولكن اسأل عنها جاريتها وستصدقك القول . يعنى حاول يخلي الرسول برضه يسأل ويطمئن

وسأل الرسول بريره جاريتها فشهدت لها بالخير كله وقال انها لا تأخذ عليها سوى انها صغيره فى السن يعنى ممكن تسهوا على عجينها مثلا لحد ما حاجه تيجى تاكله (صغيره يعنى مش ست بيت لسه )

وما ننساش كمان اننا نقول ان زينب بنت جحش شهدت لها بالخير لما الرسول سألها عنها وده رغم غيرتهم الشديده من بعض . لكن برضه الحق حق .

المهم الرسول كده كان بدأ يطمئن لبرائتها فطلع الرسول على المنبر يشهد المسلمين على ابى سلول وقال : (يا معشر المسلمين من يعذرني من رجل قد بلغني أذاه فى اهل بيتى فوالله ما علمت على أهلي الا خيرا ولقد ذكروا رجلا ما علمت عليه الا خيرا وما كان يدخل على أهلي الامعي )

الى حصل ان ا لمسلمين اجمعوا على قتله اذا كان ده الى حصل فعلا منه لكن المشكله ان سعد بن معاذ وهو من الاوس وسعد بن عباده وهو سيد الخزرج اخذتهم الحميه قصاد بعض وعلا صوته على بعض لكن الرسول هداهم وحصل خير يعنى ..
المهم عائشه فضلت تبكى يومين وفى النهايه راح الرسول لها وقال لها :( يا عائشه انى قد بلغني عنك كذا وكذا فان كنت بريئه فسيبرئك الله وان كنت ألممت بذنب فاستغفري الله وتوبي اليه فان العبد اذا اعترف بذنبه ثم تاب الى الله تاب الله عليه .
شوفوا بقى موقف ورد عائشه رضى الله عنها رغم حداثة سنها فى الوقت ده . الاول قالت لابوها وامها يردوا على الرسول فقالوا لها : ما ندري ما نقول لرسول الله .

ردت هى : لقد سمعتم هذا الحديث حتى استقر فى أنفسكم وصدقتم به . ولئن قلت لكم إنى بريئه . والله يعلم أنى بريئه . لا تصدقونني بذلك،ولئن اعترفت بكم بأمر ، والله يعلم أنى منه بريئه لتصدقُني والله ما أجد لكم مثلا إلا قول أبي يوسف قال : فصبر جميل والله المستعان على ما تصفون .

بصراحه رد حلو اوي وانا اصريت انقله بطريقتها .

وقالت الكلمتين وادتهم ظهرها واضجعت على فراشها . وبتقول انا كنت متأكده ان ربنا هايظهر برائتى لكن ما كنت اظن انه ينزل فيا قرآن انا كان كل املي ان الرسول يشوف رؤيا مثلا تظهر براءتى.
المهم فى الوقت ده نزل الوحي على الرسول عليه الصلاة والسلام وبعدها ضحك الرسول واول ما تكلم به قال :(يا عائشه أما الله عز وجل فقد برأك)
فقالت لها امها : قومي اليه ، فردت عائشه : والله لا أقوم اليه ولا احمد الا الله عز وجل .(ردودها جامده بصراحه )

نشوف الايه بقى الى نزلت فيها :
بسم اله الرحمن الرحيم

إِنَّ الَّذِينَ جَاؤُوا بِالْإِفْكِ عُصْبَةٌ مِّنكُمْ لَا تَحْسَبُوهُ شَرًّا لَّكُم بَلْ هُوَ خَيْرٌ لَّكُمْ لِكُلِّ امْرِئٍ مِّنْهُم مَّا اكْتَسَبَ مِنَ الْإِثْمِ وَالَّذِي تَوَلَّى كِبْرَهُ مِنْهُمْ لَهُ عَذَابٌ عَظِيمٌ
لَوْلَا إِذْ سَمِعْتُمُوهُ ظَنَّ الْمُؤْمِنُونَ وَالْمُؤْمِنَاتُ بِأَنفُسِهِمْ خَيْرًا وَقَالُوا هَذَا إِفْكٌ مُّبِينٌ
لَوْلَا جَاؤُوا عَلَيْهِ بِأَرْبَعَةِ شُهَدَاء فَإِذْ لَمْ يَأْتُوا بِالشُّهَدَاء فَأُوْلَئِكَ عِندَ اللَّهِ هُمُ الْكَاذِبُونَ
وَلَوْلَا فَضْلُ اللَّهِ عَلَيْكُمْ وَرَحْمَتُهُ فِي الدُّنْيَا وَالْآخِرَةِ لَمَسَّكُمْ فِي مَا أَفَضْتُمْ فِيهِ عَذَابٌ عَظِيمٌ
إِذْ تَلَقَّوْنَهُ بِأَلْسِنَتِكُمْ وَتَقُولُونَ بِأَفْوَاهِكُم مَّا لَيْسَ لَكُم بِهِ عِلْمٌ وَتَحْسَبُونَهُ هَيِّنًا وَهُوَ عِندَ اللَّهِ عَظِيمٌ
وَلَوْلَا إِذْ سَمِعْتُمُوهُ قُلْتُم مَّا يَكُونُ لَنَا أَن نَّتَكَلَّمَ بِهَذَا سُبْحَانَكَ هَذَا بُهْتَانٌ عَظِيمٌ
يَعِظُكُمُ اللَّهُ أَن تَعُودُوا لِمِثْلِهِ أَبَدًا إِن كُنتُم مُّؤْمِنِينَ
وَيُبَيِّنُ اللَّهُ لَكُمُ الْآيَاتِ وَاللَّهُ عَلِيمٌ حَكِيمٌ
إِنَّ الَّذِينَ يُحِبُّونَ أَن تَشِيعَ الْفَاحِشَةُ فِي الَّذِينَ آمَنُوا لَهُمْ عَذَابٌ أَلِيمٌ فِي الدُّنْيَا وَالْآخِرَةِ وَاللَّهُ يَعْلَمُ وَأَنتُمْ لَا تَعْلَمُونَ
وَلَوْلَا فَضْلُ اللَّهِ عَلَيْكُمْ وَرَحْمَتُهُ وَأَنَّ اللَّه رَؤُوفٌ رَحِيمٌ

وكده ظهرت براءة عائشه من الافك والحمد لله . عارفه انى طولت عليكم لكن ليا بس كلمتين كده عايزه اقولهم فى الموضوع ده .

اولا : القذف يا جماعه . سبحان الله تلاقي ناس اسهل ما عليها انهم يخوضوا فى اعراض الناس اعاذنا الله واياكم . بجد اوحش حاجه وافظع حاجه .وفى الغالب بيبنوا كلامهم على ظنون وحاجات مش واقعيه حتى . الشيطان بيشتغل معاهم تمام .والمصيبه الحقيقه ان الناس بتصدقهم ومن غير ما يتبينوا زي ما قالت الايه (اذا جاءكم فاسق بنبأ فتبينوا ان تصيبوا قوما بجاهله وتصبحوا على ما فعلتم نادمين ). تبينواااااااااااااا قبل ما تصدقوا ارجوكم.

ثانيا : مافيش حد فوق الشبهات . الرسول عليه الصلاة والسلام كان يعلم من هى عائشه وكانت بنت حبيبه وحبيبته وكلنا نعرف مكانة عائشه منه الا انه لما سمع ما يسيئها تبين الامر اولا. لا هو صدق الكلام على طول وهد الدنيا عليه وعليها . ولا هو كمان طنش وقال لا انا واثق فى نفسي ومراتي يبقى خلاص . بحث الامر وسأل ودور قبل ما ياخد قرار او اجراء حتى قبل ان ينزل عليه الوحي كان رايح لعائشه وبيكلمها بكل لين لانه ما ثبتش عليها حاجه وفى نفس الوقت بيتأكد منها هي كمان .

ثالثا : ان كنت على حق وان كنت مظلوما فاصبر واعتصم بالله ولا تحزن فان الله معك .

وحاسه انكم زهقتوا مني على الاخر واسفه على الاطاله جزيتم خيرا عن صبركم عليا .

عائشة بنت أبي بكر

عائشة بنت أبي بكر

ولدت السيدة عائشة بعد البعثه باربع سنين او خمسه يعنى في الإسلام والرسول عليه الصلاة والسلام عقد عليها بعد وفاه السيدة خديجه بحوالي3 سنين ولما جت الهجرة سافر أبوها أبو بكر الصديق وأمها أم رومان للمدينة وهى كمان والرسول بنى بها في المدينة بعد 3 سنين من الهجرة لأنه تركها في بيت أبوها لحد ما تبلغ وتجهز للزواج وكان عمرها تسع سنين او 11 فى اقوال اخري.

وفى موضوع السن ده اتقال كلام كتير زي ما اكيد سمعتم انها كانت طفله وازاي اتجوزها . احب اوضح حاجه بسيطه ان القول الاكثر ثبوتا انها حين بنى بها كانت عمرها 11 عاما . وده ما كانش غريب تماما على الوقت ده مش بس فى الجزيره العربيه لا وفى اروبا كمان . دوروا فى تاريخهم وانتم تعرفوا . وللعلم جدتى تزوجت وعمرها 13 عاما . وكان ليا صديقه امارتيه فى عصرنا الحالي متزوجه برضه وعمرها 13 سنه .

وقريب كان فيلم بيحكي قصه اوربيه برضه من نفس الوقت تقريبا وكانت البطله عمرها ما بين 15 سنه واتجوزت البطل الى كان عمره حوالي 30 سنه . وعموما كان الشائع وقتها ان حتى لو خطبت البنت هو عمرها خمس سنوات وده كان بيحصل . كانت تترك فى بيت ابوها حتى تبلغ مبلغ النساء . وبعدين تروح بيت جوزها .

وكانت عائشة احب زوجات الرسول إلى نفسه وكانت جميلة وذكيه ولم يتزوج الرسول بكرا إلا هي حتى انه سئل من احب النساء إلى قلبك قال عائشة ومن احب الرجال قال أبوها.

وعائشة كانت بتقول أن الرسول عليه الصلاة والسلام شافها في المنام قبل ما يتزوجها فيقول (أريتك في المنام ثلاث ليالي جاء بك الملك- جبريل- سرقه أي قطعه من حرير فيقول هذه امرأتك فاكشف عن وجهك فإذا أنت فيه فأقول أن يك هذا من عند الله فليمضه).

وفى حكايات ظريفة جدا كانت بتحصل مع الرسول وعائشة

مثلا زوجات الرسول التانيين كانوا بيغيروا من عائشة لان أصحاب الرسول عشان كانوا عارفين مكانه عائشة عند الرسول عليه الصلاة والسلام فكانوا يقصدوا يهادوا الرسول في يوم وجوده عند عائشة فاجتمعوا عند أم سلمه وكانت من زوجات الرسول إلى لهم شخصيه قويه .

وقالوا لها تطلب من الرسول انه يكلم أصحابه يهادوا أينما كان لان بقيت زوجاته يرغبون في الخير مثل عائشة فلم يرد الرسول

وبعد أن كررت الطلب ثلاث مرات قال لها(يا أم سلمه لا تؤذيني في عائشة فانه ما نزل على الوحي وأنا في لحاف امراه منكن غيرها).

وكان لما بنزل سيدنا جبريل على سيدنا محمد كان ليلقى السلام على السيدة عائشة فكانت تقول:قال لي رسول الله صلى الله عليه وسلم يوما يا عائشة هذا جبريل يقرئك السلام . فقلت يا رسول الله عليه السلام ورحمه الله وبركاته ترى ما لا أرى.

وكان الرسول عليه الصلاة والسلام يدلع عائشة ويقولها عائش أو عويش وكمان كان بيهزر معاها ويلاعبها فهي بتحكى إنها أول ما اتجوزت كانت صغيره فكان الرسول بيشيلها على كتافه عشان يفرجها على مظاهر العيد من الشباك

وكمان فى حكاية ظريفة أوى عن السيدة عائشة بتقول : إنها كانت بتساقر مع الرسول عليه الصلاة والسلام وفى مره قال للناس إلى معاه يسبقهم وقال لعائشة يلا نتسابق وكانت عائشة صغيره في السن ورفيعة كمان فجريت وسبقت الرسول فالرسول سكت لكن لما وزنها زاد رجع قالها يلا نتسابق وسبقها هو وقالها كده واحده بواحده.

شفت الرسول كان دمه خفيف وبيهزر ويجرى ويسابق مراته مش دلوقتى تلاقى أزواج ماشين طول النهار يقرفوا في بعض بس ومتخيلين إن خلاص هما اتجوزوا فخلاص يبقى يكشروا بقى يشيلوا الدنيا على دمغهم ويقرفوا في بعض كان الجواز ده خناقه أو حرب مثلا لازم يكون فيها غالب ومغلوب.

والرسول اهوه بيهزر ويلعب عشان كل الناس فاكرين أن الرسول ده أو حتى الى متدين شويه لازم يكون معقد ومش بيضحك أبدا وفى دايماعقده على جبينه وما بيعملش حاجه خالص في الدنيا غير الدين.

والسيدة عائشة كانت تعرضت لازمه كبيره جدا بس لأنها السيدة عائشة فتحملت وخرجت منها وهى كانت حادثه الإفك العظيم وهى حكاية طويلة نبقى نتكلم فيها بعدين إن شاء الله.

وعلى فكره السيدة عائشة كانت ذكيه جدا وبتحفظ كويس كانت بتحفظ قرآن واحاديث كتير اوي مرويه عنها وحتى كانت بتحفظ شعر وكل حاجه بتتقال قدامها .

وكمان عروه ابن الزبير كان بيقول إنها كانت بتبقى حافظه وصفات في الطب وسألها منين بتعرفي الوصفات دى فقالت إنها لما بتسمع حد بيوصف علاج لحد بتحفظه على طول .

عائشه كمان كانت لها ادوار مهمه جدا سياسيه كمان فى كل العصور الى عهدتها .

وكان الرسول يقول عنها : فضل عائشه على النساء كفضل الثريد على باقي الطعام (البخاري ) الثريد تقريبا عباره عن اكله من دقيق وسمن ولحم .

وحقيقى عندى كلام عن عائشه عايزه احكيه لكم اد الي اتكتب ده لكن مش عايزه اطول عليكم . لكن فى موضوع مستقل هانتكلم عن حادثة الافك ان شاء الله .

والرسول عليه الصلاة والسلام مات وهى عندها عشرين سنه تقريبا وكان في بيتها ومات وهو في حجرها

وهى ماتت وهى عندها66 سنه ودفنت في البقيع .

سودة بنت زمعه

سوده كانت صحابية جليلة وكانت متزوجه قبل الرسول عليه الصلاة والسلام من ابن عمها السكران بن عمر وقد هاجر للحبشة في هجره المسلمين الأولى ومات وبعد ذلك تزوجها الرسول عليه الصلاة والسلام و كان ذلك بمثابة مكافأة من الله سبحانه على ما رأته في حياتها من ألم .

طب إيه الحكاية بقى كان ازاى: جاءت خوله بنت حكيم لرسول الله الصلاة والسلام راحت قالت له انه كفايه كده بقى والمفروض انه يتزوج وكان فات على موت خديجه حوالي 3 سنين فسألها مين يعنى تقترح فقالت له: بنت حبيبك . فقال :من؟ قالت: عائشة.

فقال لها لكنها صغيره فقالت اعقد عليها الآن فقط فقال ولكن من يرعى البنات إلي هما من خديجه يعنى فقالت له على سوده بنت زمعه وفعلا اتجوزها ودخل بيها قبل عائشه وكانت أول من تزوجها بعد خديجه وفضلت لواحدها حوالي 3 سنين لحد ما جت عائشه زى ما قلنا في المدينة

المهم هي كانت انسانه عظيمة واعانت الرسول على تربية بناته من خديجه وكانت نعم العون والمربيه لهم وكانت محبوبه من زوجات رسول الله كلهم وبناته .

وكانت جسمها تقيل حتى أن الرسول عليه الصلاة والسلام كان وهو بيصلي بزوجاته كان لما يحب يعاكسها يطول فى السجدة عشان ده طبعا كان يضايقها عشان هي مليانه و كمان كان يمشى وراها يقلد مشيتها.

وكانت عائشة بتحبها جدا وقالت عنها:ما رأيت أمر أه احب إلى أن أكون في مسلاخها (يعنى طريقها أو هديها) من سوده بنت زمعه إلا أن بها حده.

وعلى فكره كانت سوده كبيره في السن عن الرسول كثير لدرجه إنها لما تقدمت في السن أوي أشفقت على الرسول من عشرتها وقالت لقد وهبت يومي لعائشة على أن أبقى في جوار رسول الله لأنها كانت عارفة حب الرسول عليه الصلاة والسلام لعائشة وده طبعا إيثار منها وذكاء طبعا.

وفى موقف ظريف حصل بينها وبين عائشة بتقول إيه بقى كانت سوده عامله كعكه للرسول عليه الصلاة والسلام وعائشة كان مش بتحبها ففضلت سوده تقولها لازم تأكلي منها وبعدين قامت سوده واخدت حته وعملتها في وشها بالعافية عشان تآكل فالرسول فضل يضحك عليهم وقال لعائشة اعملي فيها زي ما عملت فيك وعملت فعلا كده. هزار تقيل شويه بس هزار برضه.
المهم بقى إيه إن سوده رضى الله عنها عاشت كثير وعمرت وماتت في المدينة في آخر خلافه عمر بن الخطاب .

السيده خديجه بنت خويلد

السلام عليكم ورحمة الله وبركاته

احبائي فى الله النهارده هانبدا سلسله من الموضوعات عن زوجات الرسول ان شاء الله والى انا شايفه انها مدرسه اجتماعيه وزوجيه على الوجه الاخص عظيمه جدا جدا .
واحب انوه ان انا عملت الدراسه بشأنها بعد ما ناقشنى بعض الناس بشكل سيء حول زيجات الرسول وظروفها ولا سيما زواجه بالسيده زنيب بنت جحش .
وده خلانى ادور فى الموضوع واعجبت به وكتبت عنه البحث الصغير ده واتمنى تشاروكوني فيه
ومراجعي فيه كانت مجموعة كتب صغيره بالاضافه الى كتاب نساء بيت النبوه لعائشه بعد الرحمن ده بالنسبه للاسانيد والوقائع انما التعليقات والتحليلات ليا .

وطبعا هانبدأ كلام عن السيده خديجه رضى الله عنها الى لو كتبنا عنها كتاب مش هانكفيها حقها .

السيدة خديجه بنت خويلد

وقد لقبت قبل الإسلام بالطاهرة العفيفة وبعد الإسلام بأم المؤمنين وكانت ورثت عن أبيها خويلد القرشي ثروة طائلة واشتغلت في التجارة وكانت مشتهرة بالحزم ورجاحة العقل وقد تزوجت مرتين قبل الرسول عليه السلام
وقد كان الرسول عليه الصلاة والسلام يعمل معها وكان اصغر منها بخمسة عشر عاما وكانت السيدة خديجه جميلة وذكيه يسعى إليها الرجال لكنها كانت ترفض الزواج وفعلا راحت للرسول عليه الصلاة والسلام وكان فعلا يميل إلى خديجه ولكنه كان يخاف رفضها أو يرى أنها ذات مقام عالي وكان الزواج وأصبحت خديجه بعد ذلك أم المؤمنين بعد الرسالة
واكيد كان لها حكمه زواجه منها لان فى المرحله دي من كان محتاج حد يقويه ويكون له مركزه ويمنع عنه أذى المشركين وطبعا خديجه رضى الله عنها كانت نعم السند لانها كانت شخصيه قويه ومرموقه ومسموعه كلمتها فى مكه وقتها .
وكان الرسول عليه الصلاة والسلام يكن لها كل الحب والاحترام حتى بعد موتها فكانت السيدة عائشة تقول : ما غرت على أحد من نساء النبي كما غرت على خديجه وما رايتها.
الرسول عليه الصلاة والسلام كان يكرم خديجه حتى بعد موتها يكرمها فى اصحابها واهلها ولحد ما مات الرسول كان يودهم وكان يرتاع لما يسمع صوت اختها هاله بنت خويلد لان صوتها كان زي صوت خديجه . تخيلوا ؟؟ يا بختها . بجد تحس انه كان بيحبها اوي وشايل جميلها على راسه واكيد هى كانت تستحق كده .

وفى مره كان الرسول عليه الصلاة والسلام يشكر في خديجه فغارت عائشه وقالت له: ما كانت إلا عجوز أبدلك الله خير منها . فغضب الرسول عليه الصلاة والسلام لدرجه أن عائشة دعت ربنا انه يذهب غضب النبي عنها وهى مش هتذكر خديجه بسوء مره ثانيه وقال لها الرسول عليه الصلاة والسلام:لا والله ما أبدلني الله خير منها آمنت إذ كفر الناس وصدقتني و كذبني الناس وواستني في مالها إذ حرمني الناس ورزقني منها أولادا إذ حرمني أولاد الناس . ولما رأى جزع طائلة لغضبه قال : كيف قلت ؟ والله قد آمنت بي إذ كذبني الناس وآوتني إذ رفضني الناس ورزقت منها الولد وحرمتموه منى.

وقد قال الرسول عنها :افضل نساء أهل الجنة خديجه بنت خويلد وفاطمة بنت محمد عليه الصلاة السلام و مريم بنت عمران آسيه بنت مزاحم أمراه فرعون. صدق رسول الله صلى اله عليه وسلم.

وقال :اتاني جبريل فقال : يا رسول الله هذه خديجه قد أتتك ومعها اناء فيه طعام أو إدام أو شراب وإذا هي قد أتتك فاقرأ عليها من ربها السلام ومني . البخاري
فأي فضل لها رضي الله عنها .
وماتت السيده خديجه بعد زواج بالرسول دام اربعه وعشرون سنه ويزيد ودفنت رضى الله عنها فى مكه .
رضى الله عنها وارضاها لن نوفيها حقها مهما قلنا .
وشكرا لكم واسفه على الاطاله