الجمعة، 3 يوليو 2009

آية الزواج



فى الحقيقه يا جماعه انا اخترت النهارده اتكلم عن الزواج

مش من الناحيه الشرعي ولا احكامه ولا كل ده انما من جانب مختلف ورؤيه شخصيه زي ما انتم عارفين طريقتى

الزواج ده نظام اجتماعي قننه الشرع
يعنى ايه ؟يعنى اساسا الزواج كان موجود من قبل الاسلام لكن كان فى اخطاء وعادات كتير غلط وجه الاسلام حط قوانين للنظام الاجتماعي ده ونظمه .

طيب بعد اذنكم عايزه اتكلم من خلال الايه دي شويه


ومن اياته ان خلق لكم من انفسكم ازواجا لتسكنوا اليها وجعل بينكم مودة ورحمة ان في ذلك لايات لقوم يتفكرون
سورة الروم - سورة 30 - آية 21

معلش ركزوا بقى معايا وتعالوا ناخدها حته حته


ومن آيته ان خلق لكم من انفسكم ازواجا : الايه معتبره فكرة وجود ازواج دي آيه من ايات الله فى خلقه معجزه يعنى (والازواج هنا من الجنسين يعنى )


ازواجا لتسكنوا اليها : شوفوا السبب من وجود الازواج ايه السكنــــى


يعنى ايه سكنى : لما نقول سكن الشيء يعنى استقر مكانه السكنى هنا استقرار واطمئنان وهدوء نفسي


وجعل بينكم مودة ورحمه : هنا بقى الحقيقه انا وقفت قدام الكلمه دي شويه كده شمال ويمين وكلمة جعل خصوصا
بنلاقيها دايما مذكوره فى القرآن مع المسلمات والافعال الالهيه زي وجعلنا الارض مدادا .... مثلا


والايه دي كمان حتى فى اقران بين خلق السموات والارض والازواج على اعتبار ان وجود الازواج منحه الاهيه برضه

فاطر السماوات والارض جعل لكم من انفسكم ازواجا
سورة الشورى - سورة 42 - آية 11

نرجع للايه الاولى بتاعتنا
وجعل بينهم موده ورحمه .... وكانها منحه الاهيه .. الى هى ايه المنحه ؟ الموده والرحمه
يعنى دي موجوده بامر الله بس احنا الى مش بنقدرها ولا بنراعيها ابدا احنا بنهملها جايز بننساها بنبوظها اي حاجه بقى
الموده والرحمه : والله العظيم موده ورحمه مش خناق وعراك ومحاكم وحرب اهليه فى البيوت

وفى نهاية الايه بقى بيقول : ان فى ذلك لايات لقوم يتفكرون


يتفكرون عشان خاطري تتفكرون شويه وتعرفوا يعنى ايه زواج وعشان ايه



وفى ايه تانيه برضه ذكر فيهاالزواج لكن تعالوا نقرا الايه كده وقلولي حاسين ايه من معناها

والله جعل لكم من انفسكم ازواجا وجعل لكم من ازواجكم بنين وحفدة ورزقكم من الطيبات افبالباطل يؤمنون وبنعمت الله هم يكفرون
(5)
سورة النحل - سورة 16 - آية 72

الايه بتعد بعضا من نعم ربنا عليكم الى المفروض نشعر بها بالامتنان لله عز وجل
شايفين عدوا كده


جعل لكم من انفسكم ازواجا


ومش بس كده كمان من ازواجكم رزققكم اولاد


ومن الاولاد احفاد


خلاص بيقيتوا قبيله ؟


طيب ورزقكم بالطيبات كمان عشان تعيشوا وتستمتعوا بحياتكم
وبعد ما ربنا عد لنا جزء من نعمه


الايه بتسالنا بعد كله ده وبتعجب : افبالباطل يؤمنون وبنعمت الله هم يكفرون


شايفين القرآن ازاي بيصور الزواج والازواج كنعمه من نعم ربنا علينا ؟


واحنا من اول ما يقابلنا مشكله فى حياتنا نقعد نردد الاسطوانه اياها بتاعة يجى الى عايز يتجوز يشوف
ما كنا حلوين بلا جواز بلا قرف
وكلمه بيقولها جايز بهزار وجايز بجد
وجايز فى وقت هو فيه مضايقه
اوعى تتجوز يا ابنى خليك كده فى هوى نفسك بلاش وجع قلب ادينى باقول يا ريت الى جرى ما كان
وهى تقول ما تستعجليش يا اختي على الجواز بكره تتجوزي وتقولي ولا يوم من ايام بيت اهلي تروحي تجيبى واحد يتحكم فيكى ويقرفك
لييييييييييه مين بس قال كده
جايز المتجوزين بيقولوا الكلام ده كده هزار جايز جد جايز هما فاشلين فى حياتهم
بس حرام عليهم ومش من حقهم ابدا يسودوا الدنيا فى عين الشباب
عشان فعلا الكلام ده بياثر عليهم وحقيقى بقت مشكلة العنوسه تكاد تكون فى حالات كتير هى عزوف عن الزواج مقنع غير العزوف الصريح كمان ودي مشكله كبيره بيتولد منها مشاكل اكبر وابشع لاتخفى على حد ابدا


الرسول عليه الصلاة والسلام قال :
الدنيا متاع . وخير متاعها المرأه الصالحه .
رواه مسلم عن عبد الله بن عمرو بن العاص


وقال كمان

ثلاث من السعادة ، و ثلاث من الشقاوة ، فمن السعادة : المرأة تراها تعجبك ، و تغيب فتأمنها على نفسها و مالك ، و الدابة تكون وطيئة فلتلحقك بأصحابك ، و الدار تكون واسعة كثيرة المرافق و من الشقاوة المرأة تراها فتسوؤك ، و تحمل لسانها عليك ، و إن غبت عنها لم تأمنها على نفسها و مالك ، و الدابة تكون قطوفا ، فإن ضربتها أتعبتك ، و إن تركتها لم تلحقك بأصحابك ، و الدار تكون ضيقة قليلة المرافق


الراوي: سعد بن أبي وقاص المحدث: الألباني - المصدر: السلسلة الصحيحة - الصفحة أو الرقم: 1047خلاصة الدرجة: حسن



اقروا الحديث ده وحاولوا توصلوا للثلاث حاجات الى فيه او بعضهم واحمدوا ربنا واشكروا فضله ولو لقيتوا نفسكم مش سعداء يبقى المشكله فيكم بقى


ولو ما قدرتوش توصلوا لهم جميعا برضه احمدوا ربنا واشكروا فضله واسعوا فى مناكبها لحد ما ربنا يرزقكم
وربنا يكرمكم جميعا ويوسع عليكم ويرزقكم الازواج الصالحين لو ما كانش عندكم
ويبارك لكم ويصلح ما بين اديكم لو كان عندكم ازواج


شكرا لكم ويارب ما اكونش تقلت عليكم

هناك 14 تعليقًا:

Ahmed يقول...

تقلتي ايه بس يافندم
ربنا يكرمك على الكلام البسيط الحلو ده

بالخصوص موضوع الهزار او الجد

يقولوا بكره هتندم, وبلاش احسن وانت كده بطولك

لو يحس ان الكلام ده حرام لأنه ضد مبدأ من مبادئ دينا الجميل

ربنا يكرمك يافندم على الموضوع

صبرني يارب يقول...

احمد ابو العلا

شكرا يا فندم ربنا يكرمك

وحقيقى حاجه من اثنين الى بيقول كده

يا كداب وناكر فضل ربنا عليه

يا فاشل

غير معرف يقول...

طبعا انا المقصود
ماشي
تسكنوا اليها صحيح بس فين دول
الحريمات حاليا بيسكنوا الردالة السرايا الصفرا عنبر المتزوجين

جنّي يقول...

السلام عليكم

كيف حالك اختنا الفاضلة لعلك بخير انت واسرتك الكريمة ..

التدوينة ممتازة خارجة من القلب ولعلها تصل لقلوب من لا يفهمون الغرض من الزواج فهما كاملا ..

اتعرفين اني انظر الى الآية :( ومن اياته ان خلق لكم من انفسكم ازواجا )

انظر اليها ان الزوجة اصبحت جزء من الرجل وليس انها من نفس جنس الرجل البشري انسان يعني .. فهي اصبحت مثل أمي وأختي أصبحت جزء مني ..

شكر الله لكي ..

صبرني يارب يقول...

مصري جدا

ههههههههههههههههههههههههههه

لا لا والله مش مقصود حد بعينه صدقنى

ههههههههههههههه

العفو يافندم


على فكره هايغيروا لونها خلاص مش هاتبقى صفرا
ابسطوا بقى

نوووووورت

صبرني يارب يقول...

جني

الله يكرمك ا نت نورت


وده حقيقى الزوجين فعلا بيختلط دمهم ببعض

تحياتي لحضرتك ونورت

شمس النهار يقول...

صبوره
ايه الكلام الكبير ده

يابنتي ياحبيبتي حضرتك بتدني في مالطه
انا مش اعمل لك احباط

بس فعلا انك لاتهدي من احببت ولكن الله يهدي من يشاء

ده ملك ومنظمه سيده

عارفه لو المسلمين مشيوا بس علي ربع تعاليم الدين ربع بس هبابه صغيره كده
صدقيني الدنيا هتتعدل عدله جميله جدا

بس هي دي النفس البشريه

مع ان اللي بيسعد بيسعد نفسه واللي بيتعس بيتعس نفسه

ربنا يكرمنا جميعا
بس بجد كلام جميل جدا:)

صبرني يارب يقول...

شمووووووسه
حياتي

لسه والله كنت بافكر فيكى
وباقول عايزه اتصل عليها قبل ما انشغل فى التحضير لانى انا كمان مسافره مصيف يوم الثلاثا

بالنسبه للموضوع بقى

اهو دينا بنقووووووول جاااااااايز فرد واحد يفهم من الى مش فاهمين

ناخد ثواب

نورتي يا جميل

فشكووول يقول...

السلام عليكم
خدى بالك من الايه
ومن اياته ان خلق لكم من انفسكم ازواجا
تفكرى فيها جيدا
خلق لكم من انفسكم
احنا عارفين ان حواء خلقت من ضلع ادم
تبقى حواء جزء من تكوين ادم
ولما قال ربنا من انفسكم يعنى اللى خلقت من ضلعكم يعنى منك واليك
واحنا عارفين ان الاصل بيحن للفرع وما يقدرش يستغنى عنه وحواء فرع من ادم
وكمان عارفين ان مكان انفصال الفرع عن الاصل بيبقى فيه جرح ويألم والجرح عايز يلتأم فى اصله
يعنى العمليه منك واليك فالمرأه جزء من الرجل والرجل جزء من المرأه ولو عاش واحد لوحده من غير الجزء الاخر لذهبت الدنيا ولما كان هناك بشر
وهى دى الحكمه .. عارفه الواحد بيدى لابنه او بيصرف عليه كل ماله وكل عرقه وكده وجهده .. مع انه بيبخل على اخيه انه يصرف عليه او يعطيه شيئ من عرقه اوجهده ..ز لان الابن هو جزء من الاب والاب لا يستخسر فى نفسه وكذلك المرأه جزء من الرجل والرجل لا يستخسر فى نفسه برضه المرأه ممكن تعطى ابنها لانه جزء منها وممكن تعطى زوجها لانها جزء منه .. بس خلصت اللى عندى
تحياتى

بنجاواتى يقول...

الزواج نعمة تستحق الشكر والتفكر طول العمر

يا ريت الناس تسيبنا احنا الشباب من غير ما يعقدونا :D


تحياتى

صبرني يارب يقول...

فشكول

اقول ايه طيب ؟؟

لا فض فوك يا استاذنا

حقيقى نقطه هايله هايله هايله

انا فعلا اغفلت الكلمه دي عن غير قصد فى الموضوع
الى هى من انفسكم

وفعلا فعلا انا فاهمها زي ما حضرتك قلتها كده

بس مثال الشجره والفرع راااااائع

متشكره بجد اوي لحضرتك

صبرني يارب يقول...

بنجاواتي


لا يا اخويا بعد الشر عليك من التعقيد ما تسمعش لحد

انا متجوزه بقالي عشر سنين وباقولك الجواز حلو اتجوز ياابنى
ههههههههههههه

هيثم يقول...

جزاكي الله الف خير كلام جميل ومعبر والحمد لله علي النعمة اللي احنا فيها

صبرني يارب يقول...

هيثم ربنا يكرمك يارب
نورت